1APU DIOS, nakainnilam am-in di ine-ek. 2Ya inilam am-in di at-attok. Ya takon di naka-iddawwi ka ya inilam tuwaliy wadah nomnom ku. 3Tibtibbom hin mungngunuwak weno mun-iyatuwak te inilam nimpey at-attok. 4Ya inilam am-in di kalyok takon di uggek ni-an kinali. 5He-a ya wada kah kad-ak ta nangamung ta ipaptokak te ongal di kabaelam. 6Adik maawatan hin tipet impakainnilaak ke he-a.

7Daanay pangayak ta adiyak tibon ke he-a? Ya daanay pangayak ta midawdawiyak ke he-a? Maid. 8Hin kananat umeyak hi langit ya dehdi ka. Ya hin kanana bot umeyak hi boblen di nate ya dehdi ka bo. 9Ya takon di tumayyapak ta umeyak hi nidawwi, takon di daana nah timilan di algo weno kalin-oban di algo 10ya wada ka metlaing an mangipaduttuk ya bumaddang ke ha-on. 11Ya takon di eyak mitalu nah munhihhilong weno takon di mumbalin di mapat-al hi hilong ta haniyanak 12ya hiya damdaman mapat-al di panibom, te nan hilong ya mapat-al ya nun-ingngo dan he-a.

13He-ay nunlutun am-in hi parten di adol ku handih wadaak hi putun ina. 14Ya makakkaphod di nunlutum ke ha-on, kinali dayawon daka. Inilak an makaphod ya umipamodwong am-in di inat mu. 15Handih mungkapkolak hi putun ina ya inilam an dehdiyak 16te inilaak tuwalin he-a ot ahiyak mitungo. Ya am-in nan algon kitaguwak tuh luta ya intudok mu pe tuwali nah liblum.

17Apu Dios, dakkodakkol di nomnomnomom mipanggep ke ha-on ya naligat an inilaon hin nganne dadiye. 18Gulat nat mabilang ya dakdakol mu nan lonah pingngit di baybay. Mu takon nin hin kananat pakabilangak ya adi daka pay pakainillaon ke ha-on. *

19Apu Dios, pakadadaggom ke anhan nadan gaga-ihon tatagu. Hana ot ta nadan pumapatte ya mange-ele dat midawwi dan ha-on. 20Nahalman di pamihul dan he-a ya maid di lispitu dah ngadan mu. 21APU DIOS, ihihhingit ku nadan mangihihhingit ya makibuhul ke he-a, 22te ibilang ku nadan buhul mun buhul ku damdama.

23Apu Dios, tibom di nomnom ku ya hay pangi-ek 24ya ituddum hin waday adim pinhod ke ha-on ta hannotam hi maphod. Ya ituddum di atok an makihayyup ke he-at nangamung.