1-2Madayaw hi APU DIOS.

Am-in kayun muttatyuna ya dakayun mungngunuh balena ya nah dolan di balena, dayawon yuy ngadana.

3Dayawon takuh APU DIOS te hiya ya maphod. Ikanta yuy pundayaw yuh ngadana te hiya ya maule. 4Pinilinay holag Israel an ibilang nan tataguna.

5Inilak an natagtag-eh APU DIOS an Ap-apu taku mu hay udum an dios. 6Atonan am-in di pinhod nan aton ad kabunyan ya hi luta, hi baybay ya ad dalom. 7Ialinay kulabut an ilpunah pingngit tun luta, ipaalinay kil-at an miunnud hi udan ya ipabudal na nadan dibdib an ilpuna nah nidulinan da.

8Pinatenan am-in nadan panguluwan an imbabalen nadan tatagud Egypt takon nadan namangulun impan di aggayam da. 9Inat nah diy milagro ya udum an umipamodwong ta pangastiguna nah patul ya nadah tatagu. 10Dinadag nay dakol an boble ya pinatena nadan patul an ongal di kabaelan da. 11Umat ke Sihon an patul di Amorite ya hi Og an patul di Bashan ya am-in nadan patul di Kanaan. 12Ot idat na nadah tatagunan holag Israel di numboblayan dat dadiyey makaphod an tawid da.

13APU DIOS, mipainilat nangamung di kinatag-em am-in hi tagu, takon nadan mahanhanot an holag da ya mundingngol di ngadan mu. 14He-a, APU DIOS ya itakdog mu ya homkom di tatagum an muttatyum.

15Hay dios di udum an boble ya kinapyan di tagun nakapyah silber ya balituk. 16Waday tokoda ya matada, mu adida kumali ya adida pakatibo. 17Ya waday ingada, mu adida pakadngol ya maid di yahya da. 18Hanadan manganapya ya mundinol ke dadiyen dios ya ahida mumbalin hi athidi.

19Dakayun holag Israel, dayawon yuh APU DIOS, dakayun papadina, dayawon yu damdama. 20Dakayun holag Libay, dayawon yuh APU DIOS. Ya dakayun ipaanhanay pangatanah pinhod APU DIOS, dayawon yu damdama. 21Dayawon yuh APU DIOS ad Zion ad Jerusalem an boblena.

Madayaw hi APU DIOS.