1Umamlong nan limpiyun tagun un-unudonay tugun APU DIOS.

2Ya athidi bon umamlong nan tagun ipaanhanay pangun-unudanah tugun APU DIOS.

3Adina aton di gaga-iho te nan pinhod APU DIOS di atona.

4Indat mu, APU DIOS, nadan tugun mun dakami ta un-unudon mit nangamung

5Ya hana ot ta dadiyey un-unudok. 6Te deket un-unudok am-in nadan tugun mu ya maid di humlun hi ek kibabainan.

7Ya hanah pun-adalak nadah maandong an tugun mu ya limpiyuy puhuk an mundayaw ke he-a.

8Un-unudok am-in di tugun mu, APU DIOS. Adiyak anhan iwalong.

9Nganney aton di ohan kat-agun tagut limpiyuy nitaguwanan maid di atonah gaga-iho? Mahapul an mangun-unud hi tugun APU DIOS.

10APU DIOS, atok am-in di kabaelak an mangat hi pinhod mu, mu mahapul kuy baddang mut adik iwalong di tugun mu.

11Ihaha-ad kuh nomnom kuy tugun mu ta adiyak munliwat.

12Dayawon daka, APU DIOS. Ituddum anhan di maphod an atok ta miunnud nah pinhod mu.

13Ipanidwak nadan tugun muh nomnom ku.*

14Ong-ongal di amlong kun mangun-unud hi tugun mu, mu nadan dakol an ikadangyan.

15Kinali adaadalok ya ihaha-ad kuh nomnom ku nadan tugun mu.

16Om, maka-amlongak an mangun-unud nadah tugun mu ya adik iwalong.

17Atom anhan di maphod ke ha-on an muttatyum ta mitaguwak ya un-unudok di kalyom an atok.

18Diyatom di matak ta tibok di kakinaphod nadan tugun mu.

19Nakatang ya abuy kitaguwak tuh luta. Ya mahapul kuy tugun mun mangipaduttuk hi biyag ku. Kinali baddanganak anhan an mun-awat ke dadiyen tugun mu.

20Pinhod kun abun inilaon nadan tugun mu ta un-unudok.

21Boh-olam nadan naidutan an mumpahhiyan adi mangun-unud hi tugun mu.

22Adim anhan iabulut didan manaltalangga ya mumpadngol ke ha-on te inun-unud kuy tugun mu.

23Takon nadan aap-apu ya nunhuhummangan dah aton dan ha-on, mu punnanongok an adaadalon di tugun mu.

24Umipaamlong ke ha-on nadan tugun mu te dadiyey manugun ke ha-on.

25Ad uwani ya nibakilangak tuh luta te nakaddismayaak, mu patulidonak anhan te hidiyey kinalim.

26Apu, kinalik ke he-an am-in di wadah nomnom ku ya hinumangak. Daan mo anhan ta ituttudum di pinhod mun atok.

27Ya ituttudum di ine-en di tugun mut maawatak nadan makakkaphod an inat mun umipamodwong.†

28U-umyungak an abu, mu patulidonak te hidiyey kinalim.

29Apu, baddanganak an mangat hi niptok ta bokon hay gaga-ihoy atok. Ya gapuh ulem ya ituttudum nimpe ke ha-on nadan tugun mu.

30Impakudukdul kun mangun-unud ke he-a ya in-ohhak hi nomnom kuy mipanggep hi tugun mu.

31Uggek inwalong di tugun mu, APU DIOS, kinali adim anhan iabulut an eyak mibabain.

32Gagaidak an mangun-unud hi tugun mu te inilak an idat muy ong-ongal an pun-awat ku nadah pinhod mun atok.

33APU DIOS, ituttudum di atok an mangun-unud nadah tugun mut un-unudok ta nangamung.

34Baddanganak an mun-awat nadah tugun mut ipaanhan kuy pangun-unudak am-in ke dadiye.

35Om, baddanganak an mangun-unud ke dadiyen tugun mu te umipaamlong dan ha-on.

36Ya wadaom di pamhod kun mangun-unud hi tugun mut bokon hay kumadangyanak di ek gamgaman.

37Ya baddanganak bot bokon nadan maid di hilbinay ek gamgaman. Ya paphodonak mipuun nah kinalim.

38Ipaannung mun ha-on an muttatyum di kinalim an kiphodan nadan makangngun-unud ke he-a.

39Ya adim anhan iabulut an ek aton nadan itattakut kun maat an kibabainak. Inilak an makaphod nadan tugun mu ya mabaddanganak ten un-unudok.

40Pakappinhod kun un-unudon di tugun mu. Daan mo anhan ta baliwam di pangi-ek mipuun hi kaphod mu.

41APU, ipatibom nan nahamad an pamhod mun ha-on ta ihwangak mipuun nah kinalim.

42Ta mabalin mon humangok nadan mumpadngol ke ha-on te madinolak hi kalim.

43Ya baddanganak ta hay makulug di kalyok te madinolak hi tugun mu.

44Punnanongok an mangun-unud ta nangamung hi tugun mu.

45Ta malinggopak an mumbibiyag te un-unudok di tugun mu.

46Ek ipainilah papatul di mipanggep hi tugun mu ya adik ibabain.

47Man-uke ya mun-am-amlongak an mangun-unud nadah tugun mu te dadiyey pinpinhod ku.

48Om, lispituwok nadan tugun mun pinpinhod ku ya nomnomnomok di mipanggep ke dadiye.

49APU, nomnomom anhan nan kinalim an kiphodak an muttatyum te hidiyey umidat hi namnamak.

50Hidiyen hinamad mun kinaliy mangalubyag ke ha-on hin waday ligat ku.

51Takon di tanaltalanggaanak nadah mumpahhiyan tatagu ya nanongnan adik itikod an mangun-unud hi tugun mu.

52APU DIOS, nonomnomok an dadiyen tugun mu dih doney umipaalubyag ke ha-on

53Deket tibtibok nadan gaga-ihon tatagun ngohayon day tugun mu ya namahig di boh-ol ku.

54Ya ad uwanin nakatang an kitaguwak tuh luta ya ikankantak di mipanggep hi tugun mu.

55APU DIOS, takon nah hilong ya nomnomon daka, kinali ipaanhan kun un-unudon nadan tugun mu.

56Umipaamlong ke ha-on di pangun-unudak hi tugun mu.

57He-a ya abu, APU DIOS di mahapul ku. Hamadok an kalyon an un-unudok di tugun mu.

58Ya homkonak anhan an hidiyey kinalim.

59Handih nomnomnomok di pangi-ek ya pakudukdulok an mangun-unud hi tugun mu.

60Kinali un-unudok di tugun mun adik baybayaggon.

61Takon di indadaan nadan gaga-ihon tataguy bitun kaknaak, ya adik iwalong di tugun mu.

62Bumangunak nah gawan di hilong ta dayawon daka te maandong dadiyen tugun mu.

63Ha-oy ke pe ya makihayyupak nadah pinhod nan paamlongon daka ya mangun-unud hi tugun mu.

64APU DIOS, matiboy ongal an pamhod mu tuh luta takon di daana. Ituttudum ke ha-on di mipanggep hi tugun mu.

65APU DIOS, impatibom ke ha-on an muttatyum di maphod te hidiyey kinalim.

66Ya ituttudum ke ha-on nadan mahapul an inilaok ya pumbalinonak an nalaing ya nanomnoman te mundinolak hi tugun mu.

67Handi ya kinastiguwak te nihallay at-attok, mu ad uwani ya un-unudok di tugun mu.

68Makaphod ka ya maule ka. Ituttudum ke ha-on di mipanggep hi tugun mu.

69Hanadan mumpahhiyan tatagu ya nangapya dah langkak mipanggep ke ha-on. Mu hay kakulugana ya paka-un-unudok di tugun mu.

70Makudang di pun-awat dadiyen tatagu, mu ha-on ke pe ya pun-amlongak di tugun mu.

71Kinastiguwak, mu kiphodak hidiye te inadal ku moy ine-en nadan tugun mu.

72Nabalbalol ke ha-on di tugun mu, mu hay kalibulibun balituk ya silber.

73He-ay nunlutun ha-on, baddanganak an mun-awat nadah tugun mut un-unudok.

74Hanadan ipaanhan day pangatan dah pinhod mu ya umamlong dah panib-an dan ha-on te madinolak an ipaannung muy kinalim.

75APU DIOS, inilak an maphod am-in di nomnomom an aton takon nan nangastiguwam ke ha-on.

76Hana ot ta maalubyagak nah adi malumman an pamhod mu an hidiye din kinalim ke ha-on an muttatyum.

77Homkonak anhan ta tumaguwak te pun-amlongak di tugun mu.

78Ha-oy ya ipaanhan kun adalon nadan tugun mu, mu nada ken mumpahhiya ya hana ot ta maba-inan da gapu nadah nalgom an ipabahul dan ha-on.

79Ya hana ot ta nadan mundayaw ke he-a an nanginilah tugun mu ya mihayyup dan ha-on.

80APU DIOS, hana ot ta baddanganak ta paka-un-unudok di tugun mut adiyak mibabain.

81Immingleyak mon munho-ho-od hi pangihwangam ke ha-on, mu takon di athidi ya madinolak hi kalim.

82Takon anhan ot hahalipat-ak di pangipaannungam kediyen kinalim an atom, mu immingleyak mo nimpen munhood ot kanak di “Kon-anan tuy pamaddangam ke ha-on?”

83Maid di hilbik, umatak nah daan an kimmulhin bolat di aggayam an adi mo mabalin an pangiha-adan hi mainum, mu takon di athidi ya nanongnan un-unudok di tugun mu.

84Apu, kon munho-ho-odak ta inggana? Kon-anay pangastiguwam hanadah mangipaligligat ke ha-on?

85Hanadan mumpahhiyan tatagun kahing hi tugun mu ya nungka-ut dah bitun kaknaak.

86Midinol am-in di tugun mu, kinali un-unudok yaden paligligatonak hi maid di gapuna. Ta hidiye nan baddanganak anhan!

87Dandanin patayonak ke dadiyen buhul ku, mu uggek inwalong di tugun mu.

88Ihwangak anhan ta pangipatibom nah adi malumman an pamhod mu ta un-unudok di tugun mu.

89APU DIOS, inhamad muy kalim hi langit te hidiyen kalim ya munnananong ta nangamung umat hi langit.

90Athidi bon munnananong ta nangamung di pamaptok mu nadah mahanhanot an holag di tagu ya umat tuh lutan lintum an munnananong ta nangamung nah nipab-unana.

91Ya gapuh olden mu ya nunnanong ingganad uwani nadan lintum nah niatan da.

92Gulat nat maid di tugun mun umipaamlong ke ha-on ya wadan nateyak hi nabayag te namahig di hinolholtap ku.

93Ya gapu nimpe nadah tugun mu ya nanongnan mataguwak, kinali adik iwalong dadiye.

94Ihwangak, APU te taguwak ke he-a ya inun-unud kuy tugun mu.

95Botbotakkonak nadah gaga-ihon tatagut patayonak, mu takon di athidi ya adiyak tumakut te nonomnomok di tugun mu.

96Ininnilak an takon di makakkaphod di nganneh diye ya waday pungkudangana, mu hay tugun mu ya maid di kudang na te makakkaphod an abu.

97Pakappinhod kuy tugun mu ya hidiyey nonomnomok ta nangamung.

98Om, nonomnomok ta nangamung di tugun mu ya mungkad-uman di laing ku mu nadan buhul ku.

99Ong-ongal di pun-awat kuh ine-em mu nadan muntuttudun ha-on te adaadalok di mipanggep hi tugun mu.

100Ya nanomnomanak mu nadan aam-ama te un-unudok di tugun mu.

101Inwalong kun am-in di gaga-ihon pangi-e ta paka-un-unudok di tugun mu.

102Uggek inwalong di tugun mu te he-a mismuy nuntuttudun ha-on.

103Mialig an malmalummiiy tugun mu, mu hay iyyukan.

104Nanomnomanak ya limmaingak gapuh tugun mu, ot ad uwani ya kahingngitak mon am-in di ngannen gaga-iho.

105Paddungnay dilag nan tugun mun pat-alanay dalanok.

106Ta hidiye nan punnanongok nan insapatak an un-unudok nadan maphod an tugun mu.

107APU DIOS, baddanganak anhan ta tumaguwak an hidiyey kinalim te namahig an abu tun punholholtapak.

108Abulutom anhan tun dasal kuh pumpasalamat kun he-a ya ituttudum, APU DIOS, ke ha-on di tugun mu.

109Adik iwalong an mangun-unud hi tugun mu, takon di hidiyey humlun hi katayak.

110Uggek inwalong di tugun mu takon di nangapya nadan gaga-ihon tataguh bitun kaknaak.

111Hanan tugun muy ibilang kun munnananong an odon ku, te hidiyey umipaamlong ke ha-on.

112Inhamad kuh nomnom kun un-unudok ta nangamung di tugun mu.

113Kahingngitak nadan munhalinduwan mangun-unud hi tugun mu. Ha-oy ke pe ya pakappinhod kun un-unudon di tugun mu.

114He-ay kihikugak ya mialig kan happiyok, kinali madinolak hi kalim.

115Mange-ele kayun gaga-ihon tatagu, adi kayu mihayyup ke ha-on. Ha-oy ke pe ya un-unudok di tugun nan Dios ku.

116Apu, pal-otonak ta tumaguwak an hidiyey kinalim. Adiyak anhan dismayaon nah namnamaok.

117Baddanganak ta mihwangak hi ad-adin maat ke ha-on ta waday innuk an mangun-unud ta nangamung hi tugun mu.

118Mu nadan adi mangun-unud hi tugun mu ya inwalong mu dida ot maid di hilbin di punha-haul da.

119He-a ya iwalong mu nadan gaga-ihon tatagun umat hi lugit an miwele, kinali pakappinhod kun un-unudon di tugun mu.

120Gumayonggongak hi takut kun he-a ya tumakutak nah punhumalyam.

121Maphod ya niptok di inat ku, kinali adiyak anhan iwalong ta adi aton di buhul kun ha-on di ngannen pinhod dan aton.

122Daan anhan ta ipaptok muy kiphodak an muttatyum. Ya adim iabulut an eyak punholholtapon hanadah mumpahhiyan tatagu.

123Mungkama-id di namnamak te nabayag an hinhin-od kuy pangipaannungam nah kinalim handi an ihwang muy tatagum, yaden ad-addim ipaannung.

124Atom di ngannen pinhod mun aton ke ha-on mipuun nah ongal an pamhod mut ituttudum ke ha-on nadan tugun mu.

125Muttatyuwak ke he-a, kinali baddanganak an mun-awat nadah tuttudum ta inilaok ya ta maawatak.

126Ad uwaniy pangastiguwam, APU DIOS, nadah tatagu te adida un-unudon di tugun mu.

127Pakappinhod kuy tugun mu, mu nan namahman balituk.

128Ya gapu te inilak an makaphod am-in nadan tugun mu ya kahingngitak di ad-adin pangi-e.

129Om, makaphod am-in nadan tugun mu, ta hidiye nan paka-un-unudok dida.

130Hay panginilaan hanadah tugun muy umidat hi kanomnoman ya pun-awat nadah makudang di inila da.

131Ta hidiye nan ha-oy ke ya hay pamhod kun manginila nadah tugun mu ya umat hi pamhod kuh danum ten nakauwoak.

132Tibonak anhan ta homkonak umat hi pangat mun am-in hanadah naminhod ke he-a.

133Ya ipaduttukak anhan te hidiyey kinalim ta am-in di atok ya mipuun hi tugun mut adik aton di gaga-iho.

134Ihwangak anhan hi aton nadan mangipaligligat ke ha-on ta un-unudok di tugun mu.

135Ipagibok muy ulem ke ha-on an muttatyum ya ituttudum ke ha-on di tugun mu.

136Namahig di luwak an mialig hi wa-el te adi un-unudon di tataguy tugun mu.

137APU DIOS, makaphod ka ya maandong nadan tugun mu.

138Ya niptok ya midinol nadan tuttudum.

139Paddungnay mundadalang di boh-ol ku te kahingon nadan buhul kuy tugun mu.

140He-a ya paannungom am-in di kalyom, kinali nakaballol dadiye ke ha-on.

141Takon di pakapihullonak hi tatagu ya adiyak ibilang ya adik iwalong nadan tugun mu.

142Munnanong ta nangamung di kaphod mu ya makulug di tugun mu.

143Paamlongonak nadah tugun mu, takon di dakol di ligat ku ya dakol di pundanagak.

144Baddanganak anhan an mun-awat nadah maandong ta nangamung an tugun mu ta tumaguwak.

145APU DIOS, ihamahamad ku kattog an mundasal ta ibagak anhan an humangom di dasal kut un-unudok nadan tugun mu.

146Idasal kun ihwangak anhan ta un-unudok nadan tugun mu.

147Bumangunak nah mungkabigat ta mundasalak ta mumpabaddangak ke he-a te mundinolak nah kalim.

148Adiyak pakahuyop nah hilong hi punnomnom ku nadah tuttudum.

149APU DIOS, adi malumman di pamhod mu, ta hidiye nan donglom anhan di dasal ku mipuun hi kinalimpiyum. Ya homkonak ta tumaguwak.

150Deyan mungkih-up nadan mangipaligligat ke ha-on. Dida nadan adi mangun-unud hi tugun mu.

151Mu madinolak an wada ka, APU DIOS an mamaddang ke ha-on. Ya inilak an maat am-in nadan olden mun maat.

152Ininnilak tuwali handi an nadan tugun mu ya adida mumbaliw, mu munnananong ta nangamung.

153APU, tibom anhan tun punholholtapak ta ihwangak te uggek intikod an mangun-unud hi tugun mu.

154Itakdogak anhan ta ihwangak te hidiyey kinalim.

155Hanadan gaga-ihon tatagu ya adida mihwang te adida mangun-unud hi tugun mu.

156APU DIOS, he-a ya huhhummok ka, kinali homkonak anhan ta ihwangak.

157Dakol di buhul kun mangipaligligat ke ha-on, mu adik iwalong di tugun mu.

158Kahingngitak nadan nangiwalong ke he-a te adida un-unudon di tugun mu.

159APU DIOS, ihwangak anhan gapu nah adi malumman an pamhod mun ha-on te tibom ken ongal di naminhod ku nadah tugun mu.

160Makulug am-in di kalim. Limpiyu ya munnanong am-in di tugun mu.

161Hanadan tatagun ongal di kabaelan da ya paligatonak takon di maid di numbahulak, mu nanongnan un-unudok di tugun mu.

162Gapu nadah kinalim an kiphodak ya mun-am-amlongak umat hi amlong nan tagun himmamak hi balituk.

163Kahingngitak ya umipaboh-ol ke ha-on di langkak. Mu hana ken tugun mu ya pakappinhod ku.

164Dayawon dakah mamimpituh hin-algo gapu nadah makaphod an tugun mu.

165Hanadan tatagun pinhod dan un-unudon di tugun mu ya luminggop da ya maid di humlun hi eda kahaulan ta aton day gaga-iho.

166APU DIOS, madinolak an munho-ho-od hi pangihwangam ke ha-on, ta hidiye nan nanongnan un-unudok di tugun mu.

167Paka-un-unudok di tugun mu te pakappinhod ku.

168He-a, APU DIOS ya inilam di pangi-ek ot inilam an inun-unud kuy tugun mu.

169APU DIOS, hana ot ta donglom tun pumpahpahmokak an mumpabaddang ke he-a ya baddanganak an mun-awat an hidiyey kinalim.

170Om, donglom anhan di dasal kut ihwangak an hidiye kinalim.

171Daydayawon dakat nangamung te ituttudum ke ha-on di tugun mu.

172Ya ikantak di mipanggep nadan tugun mu te limpiyu dan am-in.

173Mundadaan ka anhan ta nangamung an mamaddang ke ha-on te inun-unud kuy tugun mu.

174APU DIOS, ihwangak kuman he-a. Hay tugun mu ya umipaamlong ke ha-on.

175Om, ihwangak anhan ta tumaguwak ta dayawon daka ya hana ot ta baddanganak nadah tugun mu.

176Umatak nah kalneron natalak an humanawwangan, kinali umali ka anhan an manamak ke ha-on an muttatyum te nanongnan un-unudok di tugun mu.