1Mumpasalamat takun APU DIOS te hiya ya maphod! Hay pamhod na ya munnananong ta nangamung. 2Am-in takun holag Israel, kanan takuy “Om, munnananong ta nangamung di pamhod APU DIOS.” 3Takon di dakayun padina ya kanan yuy “Om, munnananong ta nangamung di pamhod na.” 4Am-in kayun ipaanhanay pangatanah pinhod APU DIOS ya kanan yuy “Om, munnananong ta nangamung di pamhod na.”
5Handih mabulunak ya numpahpahmokak ke APU DIOS ya dingngol nay dasal ku ot baddanganak. 6Hi APU DIOS di bumaddang ke ha-on, kinali adiyak tumakut takon di nganney aton di tatagun ha-on te dida ya tagu da ya abu. 7Ya madinolak an maapput nadan buhul ku gapuh baddang na. 8-9Kinali kudukdulnay hi APU DIOS di pangidinolan ta bokon hay tagu, takon di diday ap-apu tuh luta.
10-11Takon di linikkubak hi dakol an buhul kuh kabobboble ya inapput ku dida gapuh ongal an kabaelan APU DIOS. 12Takon di kay da iyyukan an inalibungbunganak ya nalakay nangapputak ke dida gapuh ongal an kabaelana. 13Mungkaapputak ot kuma te inlaput dan nakilaban ke ha-on, mu uggeyak te binaddanganak ke hiya. 14Hiyay mangipal-ot ya mangipaptok ke ha-on. Ya hiyay nangihwangak ke ha-on.
15-16Deyan madngol di kantan pun-an-anlaan nadan naamung an tatagun mangun-unud ke APU DIOS. Ikankanta day “Nangapput taku gapuh baddang APU DIOS an ongal di kabaelana.”
17Ha-oy ya adiyak ni-an matet ipainilak nadan inat APU DIOS. 18Uggeyak in-abulut an mate, takon di nahalman di nangastigu nan ha-on ta manomnomanak.
19Ibughul yuy panton nan Templon APU DIOS an pundayawan ta ek dayawon hiya. 20Hanadan humgop kediyen Templona ya ammuna nadan maphod di atona.
21APU DIOS, mumpasalamatak hi nangngolam hi numpahmokak ke he-a ot ihwangak.
22-23Hanan batun pinilin APU DIOS an binalon nadan mangapyah bale ya hidiye ot anhan di nahamad an ikapyah bale. Ya maphod peman hidiyen inat APU DIOS. 24Hituwey algon nangipatib-an APU DIOS hi nangapputana. Kinali mun-an-anla taku.
25APU DIOS, ihwang dakami ya bendisyonam am-in di aton mi.
26Madayaw nan ahi itud-ak APU DIOS. Ya dakamin wadah tuh Templon APU DIOS ya kanan mi damdamay “Madayaw ka.”
27Hanan AP-APU di Dios taku. Maphod di inat nan ditakun tataguna. Umala kayuh tubun di palma ta makipiyesta kayun likkodon yu nan pun-appitan.
28He-a an Dios kuy pumpasalamatak. He-a an Dios kuy dayawok.
29Mumpasalamat taku ke APU DIOS te hiya ya maphod! Ya munnananong nan ongal an pamhod na.