1APU DIOS, bokon dakamiy madayaw, mu he-a ya abu. Man-uke ya munnanong di pamhod mu ya pamaptok mun dakami.

2Tipet e kanan di tataguh udum an bobley “Daan boh nay Dios yu?” 3Hiya an Dios ya wadah langit ya atonan am-in di pinhod nan aton. 4Hay dios di udum an tatagu ya nakapyah balituk ya silber an kinapyan di tagu. 5Man-ut waday toko da, mu adida kumali. Man-u bot waday mata da, mu adida pakatibo. 6Man-ut waday inga da, mu adida pakadngol ya man-ut waday olong da, mu adida pakahamuy. 7Man-ut waday takle da, mu adida dumapa ya man-ut waday huki da, mu adida dumalan ya adi pay ni-mo gumangoy alugguug da. 8Hana ot ta am-in nadan mundinol ya manganapyan danae ya mumbalin dah umat ke dadiye.

9Ditakun holag Israel, mundinol takun APU DIOS. Hiyay bumaddang ke ditaku ya mialig an hiyay happiyo taku. 10Dakayun holag Aaron an papadi, mundinol kayun APU DIOS. Hiyay bumaddang ke dakayu ya mialig an hiyay happiyo yu. 11Ya dakayun makangngun-unud ke APU DIOS, mundinol kayun hiya. Hiyay bumaddang ke dakayu ya mialig an hiyay happiyo yu.

12Nomnomon ditakun APU DIOS ta bendisyonan ditakun holag Israel takon nadan ibba takun papadinan holag Aaron. 13Bendisyonana nadan makangngun-unud ke hiya, nawotwot weno kadangyan.

14Hana ot ta padakkolon dakayun APU DIOS, takon nadan iimbabale yu. 15Ya hana ot ta bendisyonan dakayun APU DIOS an nunlutuh kabunyan ya luta. 16Bagin APU DIOS di kabunyan ya hantu ken luta ya indat nah tatagu.

17Bokon nadan nungkakatey mundayaw ke APU DIOS te imme dah boblen di nate. 18Mu ditakun mataguy mundayaw ta nangamung ke APU DIOS.

Madayaw hi APU DIOS.