1Madayaw hi APU DIOS.

Mumpasalamatak hi ongal ke APU DIOS nah kaamungan nadan tatagunan makangngun-unud ke hiya. 2Makakkaphod am-in di aton APU DIOS. Ya am-in nadan umamlong ke dadiye ya nomnomnomon dat nangamung. 3Am-in dadiyen atona ya kitib-an di dayaw na ya kinatag-ena. Hay kinalimpiyuna ya munnanong ta nangamung. 4Adina iabulut an makal-iwan nadan makaphod an inat na.

Hi APU DIOS ya maule ya huhhummok. 5Idat nay kanon nadan mundinol ke hiya ya adina ibahhoy pakitobbalanan kiphodan da. 6Ya impatibonay ongal an kabaelana nadah tataguna handih nangipaboltanana ke dida nadah boblen di udum an tatagu.

7Maandong ya limpiyuy atona ya midinol am-in di tuguna. 8Dadiyen tugunan niptok ya makulug ya munnananong ta nangamung. 9Inat nay mahapul an atonat mihwang nadan tatagunah nihbutan da. Ya munnananong ta nangamung di pakitobbalanan kiphodan da. Hiya an Ap-apu ya makakkaphod an abu ya madayaw di ngadana.

10Hay pangun-unudan ke APU DIOS di kipuunan di kanomnoman. Ya am-in nadan mangun-unud hi tuguna ya manomnoman da.

Hiya ya lebbeng nan dayawon takut nangamung!