1Mumpasalamat takun APU DIOS! Hiyay pundasalan taku. Ya ipainila takun am-in hi tataguh kabobboble nadan inat na! 2Mungkanta takuh pundayaw takun hiya ya kalkalyon takuy mipanggep nadah maphod an inat na. 3Dayawon takuy ngadan APU DIOS an makaphod an abu. Ya mun-an-anla takun am-in an mundayaw ke hiya! 4Hiyay pumbagaan takuh baddang ya makihayyup takun hiyat nangamung. 5-6Dakayun holag Abraham an muttatyun Apu Dios ya dakayun holag Jacob an pinilinan tataguna, nomnomon yu nadan umipamodwong an inat na ya nomnomon yun maandong di punhumalyana.

7Hiyay AP-APU an Dios taku, kinali mahapul an un-unudon am-in di tatagu tuh luta nadan tuguna. 8Te adina kal-iwan di nakitobbalana, mu punnanongonat nangamung ya paannungonay kinalinan atona takon di mala-uy kaatnan toon. 9Paannungonay nakitobbalonan Abraham ya nan hinamad nan kinalin Isaac. 10Impidwana bon kinalih diyen nakitobbalanan Jacob hi kiphodan nadan holag Israel ta nangamung. 11Kananay “Ahik idat ke dakayuy Kanaan, ta hidiyey tawidon yu.”

12O-ohay tatagun Apu Dios handi ya maid di ustuh boble da. Bokon da bobley Kanaan te nakiboble da ya abuh di. 13Nun-in-e dah kabobboble ya nunhihinnatkon di nun-ap-apun dida. 14Mu takon di athidi ya ugge in-abulut Apu Dios an mipaligligat da te kinalyana nadan papatul ot uggeda impunholholtap dida. 15Kananan diday “Adiyu aton di ad-adi nadah pinilik an tataguk ya nadah profetas ku.”

16Handi ya impaen APU DIOS di bitil hi boble da ot maid di pangal-an dah kanon da. 17Muden impamangulunad Egypt hi Joseph an nigattang hidi ot mumbalin an himbut hidi. 18Nalipuliputan di hukinah bangkiling handih nikalabutana ya nabanggolan hi gumok di bagang na. 19Nunnanong an nikalabut hi Joseph inggana kimmulug nadan kinalinan maat an hidiyey impainnilan APU DIOS ke hiya. Hidiyen naat ke Joseph di namatnaan APU DIOS hi pangi-ena. 20Kay anhan ya imbukan nan patul kediyen bobleh Joseph. 21Ot hiyay impumbalinan mangipaptok hi nunhituwana ya hiyay tinuddunan mun-ap-apun am-in nah boble. 22Hiya boy tinuddun nan patul an ap-apun nadan opisyal na. Ya hiya boy waday lebbeng nan mangituttudu nadah konsehal nan patul hi maphod an aton da.

23Indani ya imme day pamilyan Jacob ad Egypt ot mumboble dah di. 24Kediyen wada dah di ya indatan APU DIOS didah dakol an imbabale da. Ya impumbalinan ong-ongal di kabaelan da mu nadan iEgypt an buhul da. 25Loktat ya impumbalin APU DIOS an kahingngitan nadan iEgypt dida ot munhuhummangan dah gaga-ihon aton da ke dadiyen tataguna.

26Indani ya binaal nah Moses an muttatyunan umed Egypt. Ya tinuddunah Aaron an bumaddang ke hiya. 27Imme dad Egypt ot aton day umipamodwong hi hinangngab nadan tatagud Egypt. 28Impahilong APU DIOS di Egypt, mu nanongnan adida un-unudon nan kinalinan ipae da nadan tataguna. 29Impumbalinah dala nan danum nadah wa-el ot maten am-in di dolog hidi. 30Indani bo ya impaenay dakol an bakbak ot mapnuy Egypt takon di balen nan patul. 31Minandal nay dakkodakkol an lalog ya imuk ot op-opan day Egypt. 32Ya impaenay dalalu ya kil-at. 33Ot madadag di kakaiw ya am-in di nitanom umat hi grapes ya kaiw an fig. 34Minandal na boy dakkodakkol an dudun an umed Egypt. 35Ot kanon dan am-in di nganneh diyen nitanom hidi. 36Indani mo ahan ya pinatenay panguluwan an imbabalen am-in nadan iEgypt.

37Ot ahina ipangulu nadan holag Israel an tumayan hidin dakol di inala dah silber ya balituk. Ya maid ke diday timmayan an nakapuy weno mundogo. 38Hanadan iEgypt ya takutan da nadan holag Israel, kinali immamlong da handih timmayan da. 39Imbiklag APU DIOS di kulabut an manidum ke dida nah mapat-al ya deket hilong ya mumbalin hidiyen kulabut hi apuy ta panilag da. 40Ya handih numbaga nadan tatagunah dotag ya impaalinay dakkodakkol an hamuti ya nun-oganay tinapay an nalpuh kabunyan an kanan dan manna. 41Pini-ang na boy batu ot bumudal di dakol an danum an inumon da ot mawaday wa-el nah mamagan adi maboblayan. 42Man-uket inat nan am-in danae ya uggena kinal-iwan handin kinalina nah muttatyunan hi Abraham.

43Impanguluna nadan holag Israel an maka-am-amlong an timmayan ad Egypt. 44Indat nan diday boblen di udum an tatagun adi mangun-unud ke hiya ot diday mangalah bungan di intanom da. 45Inat na datuwet un-unudon nadan tatagunan am-in di tuguna.

Madayaw hi APU DIOS!