1Dayawon daka APU DIOS.

He-a an Dios ku ya nakattag-e ka ya nunna-ud an madayaw ka ya ongal di kabaelam. 2Paddungnay imbulwatim di pat-al ya ibiklag mun kay kurtinay kabunyan. 3Binohwat muy balem hidih kabunyan an kalpuwan di udan ya kay mu puntakkayan di kulabut an pun-ien di dibdib. 4Ba-ba-alom di dibdib ya apuy an mangat hi pinhod mu.*

5Ya tun luta ya inhamad muy niha-adanat adi madlig. 6Ot iha-ad muy baybay hi tap-ona an kay mu imbiklag ya nalimuy bibilid. 7Handih nunmandal kan kay kidul di kalim ot donglon nadan danum ya inun-unud daka ot mange da. 8Dimmayyu da nadah bibilid ot ume da nadah nundotal ot ahida mumpae nadah indadaan mun kiha-adan da. 9Inha-ad muy koltog an kipoppogan di baybay ta adida lumakbit adi malbong boy luta.

10Impabudal muy danum nadah ob-ob ta mumpae da nadah wangwang ya wa-el hi numbattanan di bibilid. 11Ta waday inumon nadan mailom an aggayam, umat hi kabayu ya nadan udum an aggayam. 12Ya nadan hahamuti ya numbuya da nadah kaiw nah nih-up hi pingngit di wa-el ya mungkanta da nadah hapang na.

13Ya ipaalim di udan an mundanum hi nungkitanom, ta hidiye nan mabendisyonan di luta. 14-15Impatmol muy holok an kanon di baka. Ya winadam di itanom di tagut waday pangal-an dah makan an ikilog di adol da. Ya winadam boy grapes an mikapyah mainum an pun-amlongan di tagu ya hay lanan di oliba an iapuwap dah anga dat pumhod di ang-ang da.

16Takon nadan nun-itanom mun kakaiw an sedar ad Lebanon ya madanuman da. 17Hidiy pumbuyaan di hahamuti. Ya nada ken stork ya ikapya day buya da nadah bolbol. 18Hanadan mailom an gulding ya eda miha-ad nadah natag-en bilid ya nadan badger ya mumbale dah dopla.

19Ya nan lintum an bulan hi kabunyan di panginilaan hi himbulan. Hanan algo ya inilanay kalin-obana. 20Winadam di hilong ta deket timmapol ya bumuddal nadan mailom an aggayam. 21Hanadan mungkaongal an layon ya mun-olmom dan e manamak hi kanon dan winadam, Apu Dios. 22Ya deket mungkabigat ya mibangngad da nah eda kahuypan. 23Mu hay tagu ya mungngunu nah mapat-al inggana mahilong.

24APU DIOS, napnuy lutah lintum mipuun hi laing mu. 25Hanah ambiambilog an baybay ya dayya dah diy lintum, o-ongal ya i-itay an adi mabilang. 26Hidiy pundalanan di bapor ya hidiy pun-ay-ayyaman nan lintum an katatakut an aggayam an Lebayatan.

27Am-in datuwen lintum ya he-ay pangidinolan dah kanon dan idat mu nah tiempon punhapulan da 28ta mabhug da ke dadiyen makan an winadam. 29Mu deket inwalong mu dida ya tumakut da. Ya deket binangngad muy yahya da ya mate dat mibangngad da nah lutan nakapyaan da. 30Deket ipaem di Espiritum ke dida ya maltu da boy udum ta nanongnan kay baluy luta.

31Hana ot ta munnananong di dayaw APU DIOS ya hana ot ta munnananong hiyan mun-am-amlong gapu nadah lintuna. 32Hiya ya takon di ammunay iang-ang na tuh luta ya kumolyog. Ya ammunay dapaonay bilid ya bumuddal di ahuk. 33Ta hidiye nan ad uwanin mataguwak ya ikankantak di pundayaw kun APU DIOS. Om, lakitdi waday yahyak ya hiya an Dios kuy dayawok. 34Hana ot ta umamlong hi APU DIOS ketuwen punnomnom ku te hiyay kalpuwan di amlong ku. 35Ya hana ot ta nada ken naliwat an tatagu ya madadag dat mama-id am-in di gaga-iho tuh luta.

Hi Apu Dios di dayawok hi biyag ku.

Madayaw hi APU DIOS!