1Hi APU DIOS di patul an inumbun nah pun-ap-apuwanah tap-on nadan anghel. Gumayonggong di tatagu ya kumolyog di luta te ongal di kabaelana. 2Hiyay madayaw ad Zion. Ya hiyay Ap-apun am-in hi boble tuh luta. 3Dayawon am-in di taguy ngadanan madayaw ya umipamodwong. Makakkaphod an abuh APU DIOS.

4He-an Patul an kabaelam am-in, pakappinhod muy limpiyu ya he-ay nangipawadah maandong an pangat ad Israel.

5Dayawon taku nan AP-APU an Dios taku. Mundukkun takuh hinangngab na te hiya ya makaphod an abu.

6Handi ya da Moses ke Aaron di padi na ya hi Samuel di oha nadah nundasal ke hiya. Nundasal dan APU DIOS ot baddangana dida. 7Hiya an wada nah kulabut ya kimmalin dida ot un-unudon day tuguna.

8AP-APU an Dios mi, hinumang muy dasal di tatagum ta pangipatibom an pinakawanam dida takon di kinastigum dida gapuh numbahulan da.

9Madayaw hi APU DIOS. Dayawon taku nah bilid nad Jerusalem te hiya an Dios taku ya makaphod an abu.