1Makaphod an mumpasalamat ya mungkantah pundayaw ke he-a, APU an Katagtag-ayan an Dios. 2Ya maphod an kalkalyon di mipanggep nah ongal an pamhod muh kabiggabiggatna ya kalkalyon di mipanggep nah munnananong an pamaptok muh kahilohilong. 3Ya makaphod an mungkantah pundayaw ke he-an maunnudan hi paggango umat hi gitala ya ayyuding. 4APU DIOS, maan-anlaak an mungkanta te umamlongak nadah inat mu.

5APU DIOS, umipamodwong di atom ya naligat an maawatan di punnomnom mu. 6Hanan tagun makudang di nomnomna ya adina maawatan an 7man-ut maphod am-in di maat nadah adi mangun-unud ke Apu Dios ya kumadangyan nadan gaga-ihon tatagu, mu umat da nah maluwab an holok an ahi makadaddag. 8Mu he-a ke, APU DIOS ya mun-ap-apu kat nangamung. 9Ahi mama-id nadan buhul mu ya miwahit am-in nadan gaga-ihon tatagu.

10Mu ha-oy ke ya impumbalinak an nakal-ot umat nah mailom an bulug an baka ya maka-an-anlaak te binendisyonanak. 11Tinibok di nadadagan nadan buhul ku ya dingngol kuy tukuk nadan gaga-ihoh naapputan da.

12Mu nada ken mangun-unud ke he-a, APU DIOS ya puppumhod di biyag dan umat da nadah niyug ya umat da nadah kaiw an sedar ad Lebanon. 13Om, puppumhod dan umat da nadah kakaiw an nitanom nah Templon APU DIOS an Dios taku 14an bumubbunga da takon di naam-ama. Ya munnanong dan maluwab ya mahaybong. 15Kanan day “Maphod di pangat APU DIOS. Hiyay mialig an batun kihikugan taku. Maid di atonah nihalla.”