1APU DIOS, ikankantak ta nangamung di mipanggep nah adi malumman an pamhod mu ya nan munnananong an pamaptok mu ta takon nadan holag mih udum hi algo ya inilaon da. 2Ipainilak an munnananong di pamhod mun adi malumman ya nan munnananong an pamaptok mun umat nah kabunyan an munnanong nah niha-adana.

3Hinamad muy kalim an kanam di “Nakitobbalanak ke David an pinilik an muttatyuk. Ot kanak ke hiyay 4‘Hay holag muy mumpatul ta nangamung ya ipaptok kut munnananong ke didah diyen pun-ap-apuwam.’ ”

5Takon nadan wadah kabunyan ya ikanta day pundayaw dan he-a, APU, gapu nadah inat mun umipamodwong. Ya am-in nadan anghel mu ya dayawon daka gapu nah munnanong an pamaptok mu. 6Dahdiy umat ke he-a nadah wadah langit? Maid di miingngon he-a, takon nadan anghel an natag-e. 7He-ay matakutan hi am-in hidih langit. Ya am-in nadan wadah di ya mamodwong dan he-a. 8APU an Dios an Kabaelanan am-in, maid di umat ke he-an kabaelam an aton am-in ya munnananong di pamaptok mu.

9He-an Ap-apu ya mandalom di baybay ya padin-ongom di namahig an dalluyun. 10He-a ya abuy nakabael an namate nah katatakut an aggayam nah baybay hi Rahab. Ya gapuh ongal an kabaelam ya inapput muy buhul mu. 11Bagim di kabunyan ya luta ya am-in di ngannen wadah di te he-ay nunlutun am-in. 12Om, he-ay nunlutun am-in, takon nadan wadah north ya south, nan Bilid an Tabor ya nan Bilid an Hermon. Dadiye ya paddungnay mungkanta dah pundayaw dan he-a. 13Ongal di kabaelam, APU DIOS. Maid di adim kabaelan an aton. 14Limpiyu ya maandong di nipuunan di pun-ap-apuwam. Ya adi malumman di pamhod mu ya adim ibahhon aton di kalyom.

15Umamlong nadan tatagun mundayaw ke he-a. Dida ya mumbibiyag da mipuun hi pangipaptok mun dida. 16Ya daydayawon daka ya mun-am-amlong dat nangamung gapuh kaphod mu. 17He-ay kalpuwan di olot mi ya dayaw mi. Ya pangapputon dakami te ongal di pamhod mun dakami. 18He-a an AP-APU an makaphod an abun Dios di holag Israel di nanuddu nah patul min mangipaptok ke dakami.

19Handi ya numpatibo ka nadah tatagum an muttatyum ot kanam ke diday “Binaddangak on tindalu. Hiyay pinilik nadah tataguk an pumbalinok an patul. 20Hidiye ya hi David an muttatyuk. Hina-adak di ulunah lana ta kitib-anan hiyay tinudduk an mumpatul. 21Wadaak ta nangamung an mamaddang ke hiya. Ya hay ongal an kabaelak di mangipal-ot ke hiya. 22Maid nadah buhul nay makabael an mangapput ke hiya. Ya maid nadah gaga-ihon tataguy makabael an munhaul ke hiya. 23Apputok di buhul na ya dadagok di dahdin humingit ke hiya. 24Hiyat nangamung di pangapputok ya punnanongok di impaminhod ku ya pamaptok kun hiya. 25Ya paambillogok di pun-ap-apuwanat mipalpu nah Baybay an Mediteranean inggana nah Wangwang an Euphrates. 26Ahina kanan ke ha-on di ‘He-ay amak ya he-ay Dios kun mangipaptok ya mangihwang ke ha-on.’ 27Ibilang kun hiyay panguluwan an imbabalek ya hiyay katagtag-ayan am-in hi kapatupatul. 28Adi malumman di pamhod kun hiya ya adik ibahhoy pakitobbalak ke hiya. 29Punnanongok di pun-ap-apuwan di holag na, umat hi punnanongan di kabunyan nah niha-adana.

30-31Muden deket adi un-unudon di holag nay tugun ku ya adida ipuun hi kinalik di pumbibiyag da 32ya kastiguwok dida gapuh liwat da ta punholholtapok dida gapuh ngohe da. 33Mu takon di athidi ya punnanongok di ongal an pamhod kun David. Ya adik ibahhon ipaannung di kinalik ke hiya. 34Adik ibahhoy nakitobbalak ke hiya weno ek ibabawiy takon di ohan kinalik an kiphodana. 35Om gapuh kaphod ku ya adik ibahhoy hinamad kun kinali ke David ta adik ilangkakan. 36Hay holag nay ahi mun-ap-aput nangamung ya tibok ta munnanong ke diday pun-ap-apuwan da umat nah algon munnanong hidih kabunyan. 37Ya umat nah bulan an munnanong ta nangamung nah niha-adanah kabunyan ta kipatib-an di kinaDios ku.”

38Muden inwalong mu ot tayanam nan holag diyen pinilim an patul te bimmobboh-ol kan hiya. 39Imbahhom di nakitobbalam ke hiya an muttatyum ya pinoppog muy pun-ap-apuwana. 40Dinadag muy binattun alad di boblena takon nadan pungguwalyaan da 41ot pun-akon am-in di mala-uy limmuna. Ot katataw-an am-in di hinag-ona. 42Hanada ot ya abun buhul nay impangapput mu ot mun-an-anla da. 43Mu hiya ya impumbalin mun maid di hilbin di almas na ya uggem binaddangan hi gubat. 44Pinoppog muy dayaw na ya paddungnay intongbam hi luta nan ubunanan mun-ap-apu. 45Inagagam an maam-ama ya nibabain hi inat mun hiya.

46APU DIOS, kon-anat ahi mapoppog di athitu? Kon iwalongak mot nangamung? Ya kon munnananong di boh-ol mun kay apuy an mundadalang? 47Adim anhan kal-iwan an antikkey biyag ku ya tipet maid di hilbin di biyag min tatagun lintum? 48Am-in di tagu ya nunna-ud an mate. Kinali maid di munnananong an matagun adi milubuk.

49Apu, kon adi dakami mo pinhod ke he-a? Daan mo anhan ta ipaannung mu nan kinalim handi ke David? 50Adim anhan kal-iwan an ha-oy an muttatyum ya binana-inanak hi mangohen tatagu. Ya inippol kuy pumpadngol dan ha-on. 51AP-APU, ha-oy an pinilim an patul ya taltalanggaanak nadah buhul mu ya binana-inanak takon di daanay pangayak.

52Dayawon takuh APU DIOS ta nangamung! Amen. Ipidwak an kalyon di “Amen!”