1AP-APU an Dios kun mangihwang ke ha-on, deke anhan ta mundasalak nah mapat-al ya nah hilong 2ya donglom ta baddanganak 3te dakol di kabulubulunak ya dandaniy katek. 4Maid di olot kun umatak nadah dandaniy katena. 5Ya umatak metlaing nadah nungkakaten nilubuk an kinal-iwam ya adim mo mabaddangan. 6Ya paddungnay inggahak nah addaaddallom ya tapottapol an lubuk. 7Hay boh-ol mu ya paddungnay katatakut an dalluyun an ianudak. Kinali maid moy namnamak.

8Impumbalinak an umipaingle nadah gagayyum ku ot iwalongak ke dida. Ya kayak naknat adiyak pakabtik. 9Ta deyan namahig an u-umyungak ya adi tumittiboy matak te hay luwak.

APU DIOS, kabigabigat ya itaggek di taklek hi mumpahpahmokak ya pundasalak ke he-a.

10Kon hanadah nungkakatey pangiatam hi milagro? Nganney hilbin di milagro ke dida? Kon bumangun dat dayawon daka? 11Kon damanan e kalkalyon dadiyen nungkilubuk di mipanggep nah adi malumman an pamhod mu? Ya kon eda kalkalyon di mipanggep nah pamaptok mut nangamung? 12Kon manomnom da nah munhihhilong an boblen di naten kad-an nadan nakal-iwan an tatagu nadan milagron inat mu ya nan kabaelam an umihwang?

13Kabigabigat ya mundasalak ke he-a, APU, ta mumpabaddangak ke he-a. 14APU DIOS, tipet inwalongak ke he-an adim hangudon di dasal ku? 15Nipalpu handih kaungak ya nunholholtapak ya innangak an mate. Dehtun immingleyak mon manolholtap hi pangastigum ke ha-on. 16Adiyak pakaitpol nah namahig an boh-ol mun ha-on an paddungnay dinadagak hi bungot mu. 17Munholholtapak gapuh boh-ol mun paddungnay mungkalbong di kawad-ak. Ta deyan kayak mo ahan mungkalimu. 18Impatayan mu nadan nahamad an gagayyum ku ya nadan iibak, ta hidiye nan paddungnay wadaak hi tapol.