1APU DIOS, binendisyonam di boblem ot kumadangyan da bo nadan tatagum an holag Israel. 2Pinakawanam di liwat nadan tatagum ya kinal-iwam di gaga-ihon inat da. 3Ya kediye ya adika bumobboh-ol ke dida.

4Apu Dios an mangihwang ke dakami, ibangngad dakami anhan an mangun-unud bon he-a ya itikod mun bumoh-ol ke dakami. 5Kon punnanongom di boh-ol mun dakami takon nadan ahi mitun-ud an holag mi? 6Pal-oton dakami ot ya abun tatagum ta dayawon daka. 7APU DIOS, ipatibom di ongal an pamhod mut ihwang dakami.

8Idngol takuh kalyon nan AP-APU an Dios te kananay luminggop nadan tatagunan punnanongon day pangun-unud dan hiya. Kinali hana ot ta adi taku mo aton di gaga-iho. 9Nunna-ud an ihwang nan am-in nadan mangun-unud ke hiya ta mipatiboy dayaw na tuh boble taku.

10Hantuh maat hidiye ya ahi maawatan di tatagu nan ongal an pamhod Apu Dios ke didat makangngun-unud da mon hiya. Ya kediye ya mawaday linggop da gapuh kinalimpiyuna.* 11Kediyen tiempo ya hi Apu Dios ya abuy un-unudon di tatagu. Ya gapuh kaphod na ya uhdungana didat bendisyonana dida. 12Om bendisyonan ditakun APU DIOS an paphodonay inliyak taku ya maphod di biyag taku. 13Ya gapu boh kinalimpiyuna ya paddungnay midadaan di dalanonan umalin mumpatul.