1Ikanta takuy pundayaw takun Apu Dios an kalpuwan di olot taku. Itkuk takuy pundayaw takun hiya an Dios di holag Israel. 2Mungkanta kayu ya ipagango yuy tamburin, gitala ya ayyuding. 3Ipagango yu boy tangguyub nah piyesta taku nah Natalak di Bulan ya nah ongal di bulan. 4Te hituwey ohan tugun nan Dios Jacob an un-unudon takun holag Israel. 5Intugunah tuwe handidah aammod takun holag Israel handi kinastigun Apu Dios nadan bimmobled Egypt.*

Kediye ya waday dingngol kun kimmali, mu uggek inila. 6Kananay “Binoltan kuy makaddam-ot an impah-on yu ya pinoppog kuy nakalligat an ngunu yun himbut. 7Mumpahpahmok kayu ot inihwang dakayuh ligat yu. Hidiyey nunhumang kuh dasal yu handih dehdiyak nah nahaniyan hi mangitit an kulabut.

Ya pinatnaak di kinahamad di pangulug yud Meribah handih munlili kayu te maid di danum.

8Donglonak ke ahan, dakayun tataguk an holag Israel ten kalyan dakayu. Donglon yuy tugun ku. 9Adiyu dayawon di dios di udum an tatagu.† 10Te ha-oy di AP-APU an Dios yun nangipangulun dakayun timmayan ad Egypt. Ibaga yun ha-on di mahapul yu ta idat ku.

11Mu adiyak donglon ke dakayun tataguk an holag Israel. Te adiyak mahapul ke dakayu. 12Ot bay-an dakayun imam-a yuy ngohe yu ta pun-iat yuy pinhod yun aton. 13Gulatna ke ot ahan ta donglonak ke dakayun tataguk an holag Israel, ta aton yu nadan pinhod kun aton yu. 14Wada ot an mamingpinghan di pangapputak am-in hi buhul yu. 15Ta dida an humihhingit ke ha-on an DIOS ya ahida munyuung ke ha-on gapuh takut da ya kastiguwok didat nangamung. 16Mu dakayu ke ya panganon dakayu ot hi kapkaphodan an makan. Ya adi kayu ot makudangan hi iyyukan an idat ku.”