1Mumpahpahmokak an mumpabaddang ke Apu Dios ta donglonay dasal ku. 2Inhilhilong kun mumpahpahmok ke hiyan itatag-ek di taklek an mundasal handih naligatanak. Mu takon di in-athidik ya maid di amlong ku. 3Deket ninomnom kuy ugge namaddangan Apu Dios ke ha-on ya madismayaak.

4Adina bo udot paaliyon di hinuyop ku ya adiyak pakakali te mabulunak an abu. 5Ninomnom ku handidan nalana-un makakkaphod an tiempon 6mungkankantaak nah hilong gapuh amlong ku ya kanak hi nomnom kuy 7“Kon nanongnan iwalong Apu Dios di tataguna? Kon adi mo umamlong ke dakami? 8Kon adi dakami mo pinhod ke Apu Dios? Ya kon adina mo ipaannung nan kinalinan kiphodan mi? 9Ya kon kinal-iwana mon umulen dakamit nihannot moy namahig an boh-ol na?”

10Kanak boh nomnom kuy “Mahakit an abun ha-on an adiyak baddangan ke hiya an DIOS an Katagtag-ayan an kay hanan maid moy kabaelana.”

11Mu takon hin kananat athidi, APU DIOS ya adik kal-iwan nadan milagron inat mu handih done. 12Adi makaan hi nomnom ku dadiye te nonomnomok ta nangamung.

13Makaphod am-in di atom, Apu Dios. Maid di udum an dios an umat ke he-a. 14He-a nan Dios an mangat nadah umipamodwong ta ipatibom di ongal an kabaelam hi tataguh kabobboble. 15Ya gapuh ongal an kabaelam ya inihwang muy tatagum an holag da Jacob ke Joseph.

16Handih nala-u ka nah Maingit an Baybay ya namahig an mungkibyayyong nan danum ya takon nah dalom ya paddungnay munggagayonggong gapuh takut na. 17Ya nakal-ot di udan, mungkikidul ya namahig di kil-at an kay da panan muntayyapan. 18Kediyen mungkikidul* ya mungkiwagot di luta ya mapat-al di kabunyan gapu nah kil-at.

19Nundalan ka nah dalluyun ot agwatom nan adallom an baybay, mu maid di matiboh gattin mu. 20Impangulum nadan tatagum an kay da kalnero ya paddungnay da Moses ke Aaron di mumpattol ke dida.