1Apu Dios, lebbengnan dayawon daka nah balem ad Zion. Ya aton miy insapata min he-a 2te he-a ya donglom di dasal. Ya he-ay umaliyan di tataguh kabobboblen pumbagaan dah baddang. 3Nakaliwwat kami, mu pinakawanan dakami. 4Kinali mun-am-amlong kamin tatagum an pinilim an e makiha-ad nah balem te idat muy dakol an kiphodan mi nah Templom.

5Apu Dios, he-ay oggan mangihwang ke dakami ya donglom di dasal mi. Atom nadan umipamodwong hi pangipangapputam ke dakami. Ot gapun dadiye ya mundinol mon he-ay katagutaguh kabobboble takon nadan naka-iddawwin dakami. 6Winadam di bibilid an kipatib-an di ongal an kabaelam. 7Ya patikodom di bungug di danum hi baybay takon di hay tukuk di tatagu. 8Ot mamodwong am-in di tataguh kabobboble gapun dadiyen inat mu ot muntukuk da gapuh amlong da.

9Ipaptok muy luta an ipaalim di udan ta matinat maphod an puntanoman ya ta waday danum hanadah wangwang. Ya wadaom di intanom an bumungah makan mipuun hi pinhod mun maat. 10Tinaom di lutan tanoman mit yumam-o ta gagalan tummol ya umongngal di itanom mi. 11Ta dumakkodakkol di aniyon mi gapuh kaphod mu takon di daanan numboblayan mi. 12-13Hanadah bibilid ya dakol di halun mi umat hi kalnero ya nadan udum an aggayam. Ya nadah nundotal ya nungkatanoman hi page. Am-in da ya paddungnay pun-itkuk day kanta da gapuh amlong da.