1He-an tagun nundingngol, tipet ipahhiyam nadan gaga-ihon inat mu nadah tatagun Apu Dios?* 2Iplanuplanum di panadag muh ibbam an tagu. Ya mahakit di kalyom an umat hi hakit di liniputan di makataddom an uwa. Oha bo ya nakala-ing kan mangapkapyah langkak. 3Pakappinhod muy gaga-iho, mu adim pinhod di maphod. Ya pakudukdulom an hay langkak di hapitom mu hay makulug.

4He-an makallangkak an tagu, maan-anla kan mumpahakit hi tatagu gapuh kalim. 5Mu ahi mamingpinghan di panadagan Apu Dios ke he-an lupdukon dakah nunhituwam ta kaanon dakah boblen di matagu.

6Deket tibon nadan maphod an tataguh tuwen katatakut an maat ke he-a ya mamodwong da. Ya tumatawa dan kanan day 7“Tibon yu keh diyen tagu, adina idinol ke Apu Dios di kihwangana te idinol nah kinadangyana ya kinagaga-ihona.”

8Ha-oy ke pe ya umatak nah kaiw an oliba an immongal nah balem, Apu Dios. Idinol kut nangamung nah munnananong an pamhod mu. 9Ya mumpasalamatak ta nangamung ke he-a, Apu Dios, gapu nadah inat mu. Ya dayawon dakah hinangngab di tatagum gapuh kaphod mu.