1APU DIOS, adika anhan bumobboh-ol ke ha-on ya adiyak kastiguwon gapuh boh-ol mu. 2Paddungnay pinanaak ya dinaw-eyak ke he-a 3gapuh boh-ol mu te hay liwat ku ot deyan mahakit am-in di adol ku. 4Namahig di liwat kun kay makaddam-ot ta adiyak pakaiagtu.

5Ya gapu te uggek ninomnom ot atok di gaga-iho ya naliputanak an munhamuy mo ahan. 6Nabakugak mo ya makahakkit di adol ku ya u-umyungak. 7Namahig di atung di adol kun kay dandaniy katek. 8Maid moy olot ku te kimmakkapuyak ya mun-ungiyolak gapuh hakit di nomnom ku.

9Apu Dios, inilam am-in nadan pinhod ku ot anhan hi biyag ku. Takon di palak ku ya inilam. 10Kumanobkobak gapuh takut ku. Mungkamaid di olot ku ya adi mo tumittiboy matak. 11Gapuh liput ku ya adi mo anhan mih-up di hinag-on ku ya gagayyum kun ha-on, takon di pamilyak ya adida damdama mih-up ke ha-on. 12Hanada ke bon buhul kun ihik an mamaten ha-on ya eda indadaan di kaknaak. Ya nadan ihik nan munliput ke ha-on ya implanu dan dadagonak. Ad-addi da itikod an numanomnom hi gaga-ihon aton dan ha-on.

13Mu pamgak hi op-opyan kayak nalulok ya kayak nanganga. 14Te pakudukdulok an adik dongdonglon ya adik humangon di kalyon da. 15Man-uke ya mundinolak ke he-a, APU DIOS an Dios ku ta he-ay nangamung an bumaddang ke ha-on.

16Nundasalak ke he-an kanak di “Adim iabulut an taltalanggaanak nadah buhul ku weno eda maan-anla nah waday ad-adin naat ke ha-on.” 17Mahakit an abuy adol kut kayak mo anhan matu-i. 18Ya mabulunak gapuh liwat ku ot kalyok an makatuttuyuwak an nangat ke dadiye. 19Kahingngitanak nadah buhul kuh maid di gapuna. Dakol da bo udot ya nungkal-ot da. 20Takon di maphod di inat ku ya ballohan dah gaga-iho. Ya hay oha bon gapuna hin tipet kahingngitanak ya gapu te itakdog kuy maphod.

21APU an Dios ku, adiyak anhan iwalong ya adika midawwin ha-on, 22mu umali kat baddanganak te he-ay mangihwang ke ha-on.