1Am-in takun makangngun-unud ke APU DIOS, ikanta takuy pundayaw takun hiya gapuh amlong taku te hidiyey lebbengna. 2Ipagangohon takuy gitala taku ya mungkanta takuh pundayaw takun hiya. 3Itkuk takuy anla taku ya olton takun mungkantah balun kantan pundayaw takun APU DIOS an unnudan takuh gitala.

4Makulug am-in di kalyon APU DIOS ya mipatibon am-in hi atonan hiyay pundinolan. 5Hiya an Dios an munnananong di pamhod nan am-in hi tagu tuh luta ya pakappinhod nay limpiyu ya maandong.

6Lintunan am-in nadan dakol an wadah kabunyan gapuh kalina ya abu. Om, takon di bulan, algo ya bibittuwon ya lintuna gapuh kalina ya abu. 7Ya inamung na nadan danum hi luta ot makapyay baybay ot lukudona boy poppog na.

8Am-in takun tatagu tuh luta, dayawon takun APU DIOS ya mamodwong takun hiya. 9Te abuna nimpey kalina ya nawaday luta ya am-in nadan wadah di.

10-11Hay implanun APU DIOS ya umannung an maat ta nangamung, adinadaman e mibahho. Mu hay planun di tatagu ya pa-iyonat adi matuluy.

12Hanan himboblayan an hi APU DIOS di dayawon dan Dios da ya diday pinilinan tatagunan bendisyonana.

13-14Hi APU DIOS an dehdih langit nah pun-ap-apuwana ya uh-uhdunganan am-in di tatagu tuh luta. 15Hiyay nangidat hi nomnom da, kinali inilanan am-in di at-atton da.

16Hay patul ya mangapput hi gubat, mu bokon gapu te nal-ot nadan tindaluna. Athidi bo nah tindalun bokon gapuh olotnay pangapputana. 17Ya adi pundinolan di inlot di kakabayuh pangapputan hi gubat te takon di nakakkal-ot da ya adida kabaelan an umihwang.

18Hi APU DIOS ya paka-ippaptok na nadan makangngun-unud ke hiya ya nadan mundinol nah nahamad an pamhod na 19ta ihwang na didah kate. Takon di tiempon di bitil ya wadaonay kanon dat adida mateh inagang da.

20Hi APU DIOS di paddungnay happiyon pundinolan takun mamaddang ya mangipaptok ke ditaku. 21Om, hiya an makakkaphod di pundinolan taku, kinali umamlong taku gapun hiya.

22APU DIOS, hana ot ta munnanong di pamhod mun dakami, te he-a ya abuy pundinolan mi.