1-2APU DIOS an Dios ku, he-ay pundasalak te he-ay pundinolak. Ihwangak anhan ta adiyak apputon hi buhul ku ya ta adida maan-anlah kaapputak. 3Adim anhan iabulut an maapput nadan mundinol ke he-a, mu hay ipaapput mu ya nadan mungngohen he-a.

4APU DIOS, ituttudum ke ha-on di pangi-em ta hidiyey un-unudok. 5Ituttudum ke ha-on di innuk an mumbiyag mipuun hi makulug an tuttudum te he-ay Dios kun mangihwang ke ha-on. He-ay kawad-an di namnamak hi kabigabigat.

6APU DIOS, nomnomom an nipalpu handih done ya maule ka ya ongal di pamhod mu. 7Pakawanam anhan di numbahulak dih kaungak. AP-APU, adiyak kal-iwan te he-a ya maphod ka ya ongal nimpey pamhod mu.

8He-an AP-APU ya makaphod kan abu. Kinali ituttudum di maphod an pangi-em hanadah naliwat an tatagut hidiyey un-unudon da. 9He-ay mangipaduttuk nadah mumpakumbaban tatagu hi maphod an un-unudon da. Ya ipainilam ke diday pinhod mun aton da. 10Maule ka ya munnananong di pamhod mu nadah makangngun-unud nah nakitobbalam ke dida ya nah tugun mu.

11APU DIOS, ipaannung muy kinalim handit kal-iwam anhan nadan dakol an numbahulak ta kidayawam. 12Takon di dahdin tagun makangngun-unud ke he-a an AP-APU ya adalon da nadan maphod an mialig an dalanon da. 13Ahi puppumhod di nitaguwan dat kumadangyan da ya ahi tawidon di iimbabale da tun boble. 14Dida an makangngun-unud ke he-a ya maphod di pakihayyupan dan he-a. Ya ipainilam ke dida nan nakitobbalam. 15AP-APU, he-ay pumbagaak ta nangamung hi baddang te ihwangak hi nganneh diyen katatakut.

16APU DIOS, uhdunganak anhan ta homkonak. Te dehtun namahig moy punholholtapak ya maid di udum an hummok ke ha-on. 17Mabulubulunak an abu ya dakol di pundandanagak, kinali baddanganak. 18Om, tibom anhan hantudan kabulubulunak ya kal-iwam am-in di liwat ku.

19APU DIOS, dimmakol di buhul ku ya namahig di hingit dan ha-on. 20He-ay kihikugak, kinali ipaptokak ya ihwangak anhan. Ya adim anhan iabulut an apputonak hi buhul ku. 21Ya gapu te limpiyu ka ya makaphod ka ya ipaptokak anhan te he-ay pangidinolak.

22Om, Apu Dios, ihwang dakami anhan an holag Israel hi am-in hi ligat mi.