1Hana ot ta donglon APU DIOS di dasal mu nah tiempon maligatan ka. Om, hana ot ta ipaptok daka nah Ap-apun Dios Jacob. 2Hana ot ta malpu nah Templo nay baddang nan he-a. Ya hana ot ta malpu nah Bilid an Zion di pangipal-ot nan he-a. 3Ya hana ot ta abulutona ya umipaamlong am-in di iappit mun hiya.

4Hana ot ta idat nan am-in ke he-ay nganneh diyen ibagam. Ya hana ot ta baddangan dakat umannung an maat am-in di nomnomom an atom. 5Ta muntukuk kami gapuh amlong mi te nangapput ka ya mun-an-anla kamih pundayawan min APU DIOS gapuh nangapputam. Ya hana ot ta hummangonay nganneh diyen ibagam ke hiya.

6Inilak mon pangapputon APU DIOS nan tinuddunan mumpatul. Donglonah di nah Templo nay dasal diyen patul ya baddanganah diyen patul am-in hi pakigubatana. Ta hiyay pangapputona gapuh ongal an kabaelana. 7Hay udum an tatagu ya idinol dah almas dan makigubat ya hay udum ya idinol dah kabayu da. Mu ditaku ke ya idinol takuh ongal an kabaelan APU DIOS an Dios taku. 8Dadiyen tatagun adi mangidinol ke hiya ya maapput da ya madadag da, mu ditaku ke pe ya baddangan ditakut mangapput taku.

9Kinali APU DIOS, pangapputom anhan nan patul mi. Ya baddangan dakami nah pumbagaan mih baddang mu.