1Pakappinhod daka, APU DIOS, he-ay ikodhol ku. 2Ipaptokak ya ihwangak ke he-an Dios kun mialig an batun kihikugak ya mialig an happiyok. 3Numpahpahmokak ke he-a ya inihwangak nadah buhul ku, kinali he-ay dayawok.

4-5Gaga-ihoy na-na-at ke ha-on ot namindakol an innang an mateyak ya paddungnay munho-ho-od nan lubuk ke ha-on. 6Ot gapu ke dadiyen namahig an nunholholtapak ya numpabaddangak ke APU DIOS an Dios ku ya dingngol nay dasal ku nah Templonah langit ot baddanganak.

7Gapuh boh-ol na nadah buhul ku ya nungkolyog ta takon nan tinaddogan di bibilid ya niwagot. 8Paddungnay mun-aahuk di olong na ya mamudal hi tokonay dalang di apuy an gumeeng. 9Imbughul nay kabunyan ot duma-ul an inggattinah mangitit an kulabut 10ya nuntakkeh anghel ot mangen pun-itayap di dibdib. 11Inhaninah adol nay tapol ya mangitit an kulabut an nangdon hi udan. 12Nundagay hiyona nah mahdol an kulabut ot pun-ipae nay dalalu ya kil-at. 13Hiya an AP-APU an Katagtag-ayan an Dios ya kidul di kalina. 14Numpana na nadan buhul na ot mungkiwahit da ya impaalinay kil-at ot mamtik da. 15Ya gapuh namahig an boh-ol na nadah buhul na ya nabudhan di dalinat di baybay takon nan tinaddogan tun luta.

16Takon di dehdih tap-onad kabunyan ya nunyuung ot guyudonak nah adallom an danum. 17Inihwangak ke hiya nadah ongal di kabaelan da ya nungkal-ot an buhul kun adik kabaelan an hanggaon. 18Ya inihwangak ke hiya handih immali day buhul kun nangubat ke ha-on nah tiempon waday ligat ku. 19Man-uket binaddanganak ot ihwangak nadah katatakut an maat ke ha-on ya gapu te umamlong hi at-attok.

20Inat nah diyen hidiyey ginun-ud ku te maphod di at-attok ya maid di bahul ku. 21Inun-unud ku nadan tuguna ya uggek inat di gaga-iho te uggek inwalongan hiya an Dios ku. 22Ya uggek kinal-iwan nadan tuguna, mu inun-unud kun uggek nginohe. 23Inilanan maid di bahul ku te uggek inat di gaga-iho. 24Kinali indat APU DIOS di ginun-ud ku te maphod di at-attok ya inilanan maid di bahul ku.

25APU DIOS, makulug an adim iwalong nadan adi mangiwalong ke he-a ya maphod di pangat mu nadah maid di bahul na. 26Maandong di pangat mu nadah maphod di at-atton da, mu kastiguwom nadan mangat hi gaga-iho. 27Baddangam nadan mumpakumbaba ya ipababam nadan mumpahhiya.

28APU DIOS an Dios ku, mialig kan dilag kun mamat-al hi tapol di biyag ku. 29Gapuh baddang mu ya kabaelak an apputon nadan makigubat ke ha-on ya gapuh olot kun indat mu ya hogpok di boble takon di nakaalladan.

30Makaphod hi APU DIOS, maid di nihallan pangi-ena. Ya makulug am-in di kalyona. Hiya ya mialig an happiyon manani nadah mihikug ke hiya. 31Hiya ya abuy AP-APU. Hiya ya abuy mialig nah batun kihwangan taku. 32Hiya ya abuy mangipal-ot ke ha-on ya hiyay bumaddang hi pangatak hi maphod. 33Baddanganak ke hiyat nal-otak an bumtik ta ibtikak nadan buhul ku umat hi makawan ibtikanay mun-anup ta ume nadah natag-en bilid ta mihwang. 34Tinudduwanak ta nalaingak an makigubat ya nal-otak an mangusal hi makodhol an pana.

35APU DIOS, impaptokak ke he-a ot ihwangak an paddungnay hinaniyanak nah happiyom. Binaddanganak te ongal di kabaelam ya makaulle kan ha-on ot deyan natag-ey saad ku. 36Ya gapuh baddang mu ya pamaptok mun ha-on ya maid di oha nadah buhul kuy nangapput ya nampap ke ha-on.

37Mu numpudug ku ot anhan dida ot apputok dida. Ya uggek intikod an nakigubat ke dida inggana nadadag am-in. 38Nungkatu-i dah hinangngab ku ya adida mo pakataddog. 39Man-uke ya indatanak ke he-ah olot kun makigubat ot apputok dadiyen buhul ku. 40Impatakut mu nadan buhul ku ot bumtik da. Ya gapuh boh baddang mu ya dinadag kun am-in nadan humihhingit ke ha-on. 41Indani ya manamak dah bumaddang ke dida, mu maid. Numpahpahmok da bon APU DIOS, mu uggena inihwang dida. 42Numpatek nadan buhul ku ot mungkiwahit dah kakalata ta umat da nah dap-ul an intayyap di dibdib.

43Inihwangak ot uggeyak pinate nadah mangohen tatagu ya tinudduwak an mun-ap-apu takon hanadah tataguh udum an boble. 44Ya deket kumaliyak ya un-unudon dan am-in di kalyok. Takon nadan bokon ku tatagu ya munyuung dah punlispitu dan ha-on. 45Nama-id di tulid nadan buhul ku ot munggagayonggong dan mungkaukat nadah nuntaluwan da.

46Madayaw hi APU DIOS an wadat nangamung! Hiya ya mialig nah batun kihikugak. Om, madayaw hi APU DIOS an mangihwang ke ha-on. 47Hiya an Dios di mangibaloh gaga-ihon aton nadan buhul kun ha-on. Binaddanganak ot apputok nadan buhul kuh kabobboblet ha-oy di pun-ap-apu da. 48Ya ihwangak ke Apu Dios nadah buhul ku.

APU DIOS, uggem in-abulut an waday aton di buhul kun ha-on hi gaga-iho, mu impangapputak. 49Kinali, ikantak di pundayaw kun he-a an Dios hi kabobboble tuh luta.* 50Impanganapputak an pinilim an patul ya impunnanong muy ulem ke ha-on an hi David ya nadan holag ku.