1Datuwey kinalin Lemuel hi intugun inanan hiya: 2“Imbabalek, he-a ya nawada ka te gapuh dasal kun Apu Dios. Donglom datuwen itugun kun he-a: 3Adika makibabai te hidiyen pangi-ey humlun hi kadadagan di papatul.

4Donglom an imbabalek, hanan ap-apu ya maphod ot hin adi makanginnum ta adi deke on ena pun-am-aminulan nadan mainum an bumutong. 5Te deket imminum da ya kal-iwan da mo nadan olden ta adida mo hangudon nadan nawotwot. 6Hana ken bumutong an mainum ya inumon nadan dandaniy kateda ya nadan namahig di kabulubulunan da. 7Man-uket uminum da ya kal-ina ot ya kal-iwan da dadiye.

8-9Mahapul an maandong di atom an mangipanuh kasun nan nidiklamun makakkahmok ya ma-ma-idan an tagu. Ya itakdog mu nimpey kalebbengan nadan maid di kabaelan dan mangitakdog hi adol da.”

10Naligat an hamakon di lalakiy babain maphod di ine-ena ta iinena. Mu deket waday hamakona ta iinena ya nabalbalol mu nadan nakaballol an odon. 11Hidiyen lalaki ya ongal di dinol nan ipaptok diyen inayanay nunhituwan da. Ya gapun hiya ya makabbaddangan nan lalakit adida makudangan hi mahapul da. 12Hidiyen babai ya maphod ta nangamung di atonan adina e dadagon di inayana.

13Hiya ya mahlun mun-abol ya mangugut. 14Ya mialig hiya nah ongal an bapor an mahlun mangianamut hi pananud nah pamilyana takon di nidawwiy pangal-ana. 15Bumabbangun bo nah biggatnat idadaanay kanon di pamilyana ya ituddunay aton nadan muttatyuna. 16Pakannomnomonay balol nan lutan pinhod nan gatangon on ahina ginatang. Usalona boy pihhu nat tanomanah diyen lutan ginatang na.

17Hiya ya nal-ot ya mahlun mungngunu. 18Ya takon di nahilong ya taganay ngunu ya waday hilbin am-in di nun-atuwana. 19Hiya boy mamudun ya mangabol ya mangugut hi bulwati na.

20Ya adi naimut an umidat nadah tatagun ma-ma-idan.

21Maid di kaguhana takon di umaliy ahi kotolan te waday maatung an ibulwatin di pamilyana. 22Hiya boy mangapyah iap-ap nah kamana ya maphod di ang-ang di bulwatina.

23Lispituwon nadan ibba dan bimmoble nan inayana te hiyay oha nadah mangipangpangulu ke didan bimmoble.

24Manganapyah diyen babaih bulwati ya balikit ta igattang na.

25Hiya ya makilog ya lispituwon di tatagu ya adi madanagan mipanggep hi nitaguwan dah udum hi algo te waday dinol na. 26Nanomnoman an mungkalkalli ya midinol di kalyona. 27Hiya ya mahlu ya pakaippaptok nay mahapul di pamilyana.

28Pakallispituwon di iimbabalena ya totobalon damdaman nan inayana. 29Kanan nan inayanay “Dakol di binabain maphod di ine-ena, mu he-ay kapkaphodan.”

30Hay kinamaddikit ya humaul ya adi munnananong. Mu nan babain mundayaw ke Apu Dios ya hiyay lebbengnan midayaw ya malispitu.

31Hay athidin babai ya lebbengnan lispituwon di tatagu ya midatan hi ginun-ud na gapuh maphod an inat na.