1Imbabalek, nomnomom datuwen tugun ku ya adim kal-iwan an aton nadan kalyok an atom. 2Paka-un-unudom di tugun kut mitagu ka ya halipotpotam umat hi pangat mu nah nakaballol an odon mu. 3Ihaha-ad mut nangamung di tugun kuh nomnom mu an kay mu itudok hi puhum ya kay mu ilibod hi gamat mu. 4Ibilang mun kay mu tulang di kanomnoman ya ibilang mun kay mu gayyum nan panginilaam hi niptok ya nihalla. 5Te dadiyey mangidawwin he-a nadah binabain waday inayan dan umawis dah linalaki gapuh makaphod an kalida.

6Waday ohan himbatangan an indung-ok nah tawang di balemi 7ya tinibok di kakat-agun manangpan linalaki ya wada mo anhan on ohan didan matibon makakuddang di nomnom na. 8Tibtibbok ya mangmangnge nah nunhappangan di kalatan kawad-an di balen nan babain makilalaki. 9Handih numpaeh di nah balen diyen babai ya mungkahilong mo. 10Indani ya tinibok nan babain numbulwatih bulwatin di babain pabayad nay adol nan limmah-un nah balena ot ena dammuwon. Ya maang-ang an nakatallam hidiyen babai. 11Hay athidin babai ya pidpidngol ten mungkalkalli ya maid di baina. Maid bo udot di anamut nah nunhituwana. 12Te takon di daana ya dehdi. Em iang-ang hi kalata on dehdi. Imme ka ke boh malkadu on dehdi. Hay ena hamahamakon ya hay lalakin mangihuyop ke hiya.

13Indani ya tinibok hidiyen babain impudona nan lalakin makudang di nomnom na ot pun-awal na. Maid di ba-inan kananan hiyay 14“Inat kud uwani nadan insapatak an atok ya nun-appitak ot dehdiy natdaan an dotag. Kinali ume tah bale ta eta ihda. 15Man-uket limmah-unak ya edaka hamakon, mu maphod ta dehtu ka. 16Indadaan ku nan kamak an kahuypan tan inap-apak hi makaphod an luput an nalpud Egypt. 17Ya hina-adak hi bangbanglun myrrh, aloes, ya cinnamon. 18Maka, ume tah bale ta aton ta ya pinpinhod tan pun-amlongan di adol inggana mabigat. 19Adika tumakut ot maid nan inayak te waday nangayana ya mabayag an umali. 20Numbalun hi dakol an pihhun gastuwona kinali adi umali inggana hantuh maongal boy bulan.”

21Athidiy inat nan babain nangawis kediyen lalaki gapuh uma-awis an kali na. 22Ugge ninomnom nan lalakiy ustu ot miunud kediyen babai. Hidiyen lalaki ya umat nah bakan uggena inilan ie da nah ena kaklongan ya umat nah makawan indalana nah waday bitun kaknaana. 23Umat bo nah makawan uggena inilay maat an ena imama-uwan ya dehdi nan mumpana ke hiya mu maid di maat na te nakalladaw mo. Ya umat bo nah hamutin natapangan nah lingon ot makna. Hidiyen lalaki ya uggena inilan dandaniy poppog di biyag na.

24Kinali dakayu ken linalakin imbabalek ya donglon yuy tugun ku. 25Tibon yu ta adi kayu maawis hi athidin babai. Ya adi kayu mih-up ke hiya. 26Te hay athidin babaiy nanadag hi dakol an makannangpan linalaki. Ya athidin babaiy gumapuh katayan di dakol an manangpan linalaki. 27Hay linalakin maki-eh nunhituwan di athidin babai ya habadon da ot ya abuy katayan dat milubuk da.