1Imbabalek, adim abuluton an mangitakdog nah tagun e gimmawat nah hinag-on mu. 2Ya deket nil-un inat muy athidit kay ka nahablut gapu nah kinalim 3ya athituy atom. Mangin-e-e ka ta eka makihumangan nah tagun intakdog muy utang na, ne mumpahpahmok kan hiya ta ibagam an adina iid-on nah kinalim. 4-5Adim e palpal-iwan an e mahmahhuyop, mu eka ot ya abu ta eka makihummangan ke hiya ta maliblih kat bokon he-ay mamayad nah utang na. Ta umat ka nah makawan inibtikana nan mun-anup ya umat nah hamutin nakna mu binumtik.

6Dakayun makahigga, nomnomon yuh tuwe ta manomnoman kayu. Tibon yu key ine-en nadan gutul, 7takon di maid di ap-apu dan munmandal ke didan mungngunu ya mungngunu da peman. 8Deket inugawan on tagan day amung hi kanon dat waday kanon da nah manginudan. 9Mu nan makahiggan tagu ya mahmahhuyop. 10Kananay “Agat mahuyopak pay ni-an hi hingkatang ya mun-up-upitak ta mun-iyatuwak hi ittay.” 11Deket palpal-iwana ya loktat ta mumbalin hi nakawwotwot an ma-ma-idan hi nunhituwanan kay naakowan.

12Hanadan gaga-iho ya maid di hilbi dan tatagu ya langkak di kanalkalyon da. 13Deke on mungkidkid-ing da weno dakol di aton dan panaul dah ibbadan tagu. 14Gaga-ihoy nomnom dan ito-ol day planuh aton da ya am-in di pangayan da ya gumulu da. 15Gapun diyen pangi-e da ya maid maptok ya waday umalin punligatan dan humlun hi kadadagan da.

16Waday onom an aton di tagun kahhingitan APU DIOS, hay kakulugana ya pitu. 17Datuwe ya: Hay pumpahhiya hi pangat ya pungkalkalli, hay pangalkalyan hi adi makulug, hay pumateh tagu takon di maid di bahul na, 18hay pumplanuwan hi gaga-iho, hay punggagaid an mangat hi gaga-iho, 19hay punlangkakan an muntistigu ya hay pumpa-ih mapmaphod an punhahayyupan di tatagu.

20Imbabale, un-unudom di tugun min ammod mu. 21Iha-ad muh nomnom mun kay mu itudok hi puhum. 22Datuwen tugun miy kay mangipaduttuk ke he-a nadah atom hi kabigabigat. Datuwey kay mangipaptok ke he-a nah hilong ya datuwey kay manugun ke he-a nah mapat-al. 23Nomnomom an datuwen tugun ya paddungnay dilag an umidat hi pat-al. Ya man-uket disiplinaon daka ya ta inilaom di maphod an pangi-eh biyag.

24Datuwey mangidawwin he-ah gaga-ihon binabai ya ta adika midngolan hi makaphod an kalin di binabain waday inayan da. 25Adika mahaul hi kinamaddikit da ya adika maalawit hi pungkid-ing di mata da. 26Hanan babain pibayad nay adol na ya mabalin an bayadan di lalakih umat hi bayad di ohan tinapay mu nan lalakin mangihuyop hi babain waday inayana ya loktat ta ibayad nan am-in di wadan hiya takon di hay nitaguwana. 27Kon mabalin ikabuy di bala ya adi mageeng di bulwati 28weno igattin ya adi maatungan di huki. 29Athidi bo nah lalakin deket makihuyop hi babain waday inayana ya nunna-ud an makastigu.

30Hanan mangako ya takon di makan di inakona te naagangan 31ya mamolta hin maakhupan, ta mahapul an mamimpituy kadakol di ibayad na nah inakonat ibayad nan am-in di wadan hiya. 32Mu namam-a nan lalakin mangihuyop hi bokona inayan te kay maid di nomnom na an hiya pey manadag hi nitaguwana. 33Man-uke ya nunna-ud an punholholtapon nan inayan nan babai ya kababain mot ingganay nitaguwana. 34Te hanan mun-annil an lalaki ya namahig di bungot na ya maid di homok nan kah-in di ibalo na. 35Ta takon di kaatnay kalyon nan numbahul an lalakih ibayad nan hiya hi nangihuyopana nah babai ya adi maalubyag di boh-ol na.