1Imbabalek, adim kal-iwan datuwen ituttuduk ta datuwey un-unudom. 2Deket atom datuwe ya malinggop ka ya madukdukey biyag mu. 3Ipatibom ta nangamung di pamhod mu ya ulem hi ibbam an tagu ya limpiyuy atom ta madinol dan he-a. Adim iwalong datuwen maphod an pangat an paddungnay ibanggol mu ya paddungnay itudok muh puhum. 4Deket atom datuwe ya maphod kah hinangngab di tagu ya ke Apu Dios.

5Hi APU DIOS di pundinolam hi ustu bokon hay adol mu. 6Ya hi am-in an atom ya inomnom mu ke hiya ta ipaduttuk dakah niptok an atom.

7Adi na-ala on kanam di nakannomnoman kat idinol muh punnomnom mu. Hi APU DIOS di dayawom ya un-unudom ya adim aton di gaga-iho. 8Deket dayawom ya un-unudom hi Apu Dios ya mad-uman di olot mu ya pumhod di adol mu.

9Usalom di kinadangyan muh pangatam hanadah kidayawan APU DIOS ya idat mun hiya nadan namangulu ya kapkaphodan an bungan nadan intanom mu. 10Deket atom danae ya mahawwahawwal di aniyom hi inliyak mu ta makakkapnuy aalang mu ya makapnu nadan buhim hi kapyaom an mainum.

11Imbabalek, deket tugunon daka ya kalyan dakan APU DIOS ya adim balawon. 12Te hi APU DIOS ya disiplinaona nadan pakappinhod na, umat hi ama an disiplinaonay imbabalena.*

13Hi APU DIOS ya bendisyonana nan tagun pinhod nan manomnoman ya mawaday pun-awat na. 14Man-uke ya deket nanomnoman di tagu ya kudukdul hidiye mu hay silber ya balituk. 15Kudukdul di kanomnoman mu hay nanginan batu. Ya takon di nganneh diyen gamgamam ya adi miingngoy balol na nah balol di kanomnoman. 16Te nadan nanomnoman ya kadangyan da, madayaw da ya andukke boy biyag da. 17Maphod ya malinggop di biyag nan nanomnoman an tagu ya madinol an maid di ad-adin maat ke hiya 18ya maan-anlan adina iwalong an mun-adal te hay kanomnoman ya umat nah kaiw an umidat hi biyag nah tagun mangan hi bungana.

19Nakannomnoman ya nakala-ing hi APU DIOS kinali kinabaelanan lintuy luta ya kabunyan. 20Ya gapu bon diye ya impabudal nay danum hanadah ob-ob ya ingganay udan an nalpuh kulabut.

21Imbabalek, ihaha-ad muh nomnom muy maphod an tugun ya maphod an punnomnom. Ya adim kal-iwan an aton datuwe. 22Te pumhod di biyag mu hin atom datuwe ya pohdon dakah tatagu, gapuh maphod an pangi-em. 23Paddungnay ipaptok daka nadah maphod an tugun ta maid di gaga-ihon maat ke he-a. Ta adika umat nah tagun mundaldallan ya nihubag. 24Deket mahuyop ka ya maphod di hinuyop mu te malinggop kan maid di takutam. 25Adim takutan di ngannen dumadag an maid maptok ya immali nadah gaga-ihon tatagu, 26man-uke ya nunna-ud an ipaptok dakan APU DIOS.

27Deket mahapul di ibbam an taguy baddang mu, adim ukuhan ta baddangam hin kabaelam. 28Deket kabaelam an baddangan di hinag-on mud uwani ya adim kanan ke hiyay “Bokon ad uwaniy pamaddangak ke he-a te hi bigat.”

29Ya adika e mumplanuh gaga-ihon atom hi hinag-on mun madinol ke he-an maid di atom hi gaga-ihon hiya. 30Adika mangapyah ipabahul muh ibbam an tagu hin maid di numbahulana.

31Adika umamo nah tagun kumadkadangyan an hay pumatey inilana ta adim iun-unud hi at-attona. 32Te kahingngitan APU DIOS di nakuluk an tagu. Mu nan limpiyun tagu ya nahamad di pakihayyupan APU DIOS ke hiya.

33Idutan APU DIOS di pamilyan nadan gaga-iho, mu bendisyonanay pamilyan nan maphod an tagu. 34Ya katataw-ana nadan mumpahhiya mu nada keh mumpakumbaba ya maulen dida.† 35Ya ipadayaw na nan nalaing ya nanomnoman an tagu mu atonay kibabainan nan tagun makudang di nomnom na.