1He-an imbabalek, deket pinhod mun mabendisyonan ya donglom tun itugun ku. Ihaha-ad muh nomnom mu ya adim kal-iwan di ituttuduk ke he-a. 2Pakaddonglom nadan tugun an umidat hi kanomnoman ya atom am-in di kabaelam an mun-awat ke dadiye. 3Ya deket pinhod mun abun manomnoman ya pinhod mun mawaday pun-awat mu, 4deket hapulom an umat hi panamak muh pihhu weno umat hi panamak muh natalak an nabalol an odon 5ya inilaom di atom ta ipaanhan mun aton di pinhod APU DIOS ya mihamad di pakihayyupam ke hiya. 6Man-uke ya hi APU DIOS di kalpuwan di kanomnoman, hay dakol an inila ya hay pun-awat. 7Hiyay mumbendisyon ya bumaddang ya hiyay kay happiyon nan makangngun-unud ke hiya ta maid di ad-adin maat ke hiya. 8Ipaptok na ya adugana nadan nanongnan mangun-unud ke hiyan limpiyuy pangat nah ibbanan tagu.

9Kinali deket un-unudom di tugun ku ya inilaom an mangat hi niptok, hay maandong ya limpiyu ya inilaom di maphod an pangi-e. 10Ta manomnoman ka ya umamlong ka gapu nadah inadal mu. 11Ya ta maid di atom hi gaga-iho te inilam ya maawatam di mipanggep hi maphod an aton.

12Ya mihwang kah implanun di gaga-ihon tagu te nanomnoman ka. 13Dadiyen tatagu ya inwalong da nadan maphod an pangi-e ta paddungnay wada dah tapol. 14Pun-amlongan day pangatan dah gaga-iho ya maka-an-anla dan munhaul 15ya munlukuh ibba dan tagu ta hidiye nan adi madinol di tagun dida.

16Adika mahaul hi kalin di babain makilalaki ten nanomnoman ka. 17Hay athidin babai ya tinayananay inayanan imbahho nay insapata nan Apu Dios handih nalahinana. 18Hanan lalakin umeh balen di athidin babai ta aton dan duway malalao ya paddungnay idalanah dalan di katayan ya paddungnay umeh kadungayan an boblen di nate. 19Ya nan lalakin mangihuyop hi athidi ya adi mo mibangngad te adi pakahamak nah dalan an umeh kataguwan.

20Kinali adim aton di athidi mu un-unudom di pangi-en di maphod an tagu ta mumbiyag kan maphod di pangi-em. 21Te hay maphod an taguy munnanong an miha-ad tuh boble. 22Mu nadan gaga-ihon tatagu ya pakaanon Apu Dios dida tuh boble. Paddungnay bagutona dida umat hi pamagutan di taguh holok.