1Indani kanan APU DIOS ke Moses di 2“Kastiguwom nadan tatagud Midian gapuh inat da nadah ibbam an holag Israel. Deket nagibbun inat muh diye ya mate ka mo.”

3Ot kanan Moses nadah tataguy “Mundadaan kayun makigubat ta itakdog yuh APU DIOS ta mibaloy inat di iMidian. 4Mahapul an hinlilibuy malpu ke dakayun holag di imbabalen Israel.” 5Ot pumili nadan holag di imbabalen Israel hi hinlilibu. Ot hay bilang dan am-in an makigubat ya himpulut duwan libu. 6Intud-ak Moses dadiyen tindalun makigubat an impangulun Pinehas an imbabalen Eleasar an padi. Hiyay ukod nadah nangilinan an ngunut, takon nan tangguyub an usalonan mangipainila ten waday gubat.

7Ginubat day Midian mipuun hi kinalin APU DIOS ke Moses an aton da ot patayon dan am-in di linalaki, 8takon nadan liman patul hidin hi Ebi, hi Rekem, hi Sur, hi Hur, ya hi Reba. Ya impakipate dah Balaam an imbabalen Beor. 9Inala da nadan binabai kediyen boble takon di u-unga, hay baka da, hay kalnero da ya am-in di kinadangyan da 10ot logabon da nadan boble, takon di kampu da. 11Inamung dan am-in nadan inala da kediyen boble, nadan tatagu ya aggayam 12ot ianamut dah kad-an da Moses ke Eleasar an padi ya nadan ibba dan holag Israel nah nungkampuwan da nah nundotal ad Moab an pingngit nan Wangwang an Jordan ya dommang di Jericho.

13E dinamun da Moses, hi Eleasar an padi ya nadan mangipangpanguluh holag Israel dida nah e-elen di nungkampuwan da. 14Ya bimmoh-ol hi Moses nadah opisyal ya nadah aap-apun nadan tindalun nibangngad an nakigubat.

15Kananan diday “Tipet uggeyu pinaten am-in nadan binabai? 16Diday nangilul-uh ibba taku ot ngohayon dah APU DIOS nah Bilid an Peor te inun-unud day intugun Balaam. Ta gapun diye ya impaalin APU DIOS di dogo ke ditakun tataguna. 17Pumpate yun am-in di u-ungan linalaki, takon nadan binabain inhuyop di lalaki. 18Mu adiyu nadan u-ungan binabai ya nadan binabain ugge inhuyop di lalaki ta alan yu dida.

19Dakayun waday pinatena weno inodnanah adol di nate, miha-ad kayuh e-elen di kampu takuh pitun algo. Mahapul an aton yuy ine-en di punlini takon nadan balud yu nah mikatlu ya mikapitun algo. 20Mahapul bon aton yuy ine-en di punlini nadah bulwati yu weno kumpulmin nakapyah lalat, buuk di gulding, ya nadan nakapyah kaiw.”

21Indani ya kinalin Eleasar an padi nadah linalakin nakigubat an kananay “Datuwe nadan kinalin APU DIOS ke Moses an maunud: 22am-in nadan adi maghob, umat hi balituk, silber, giniling, gumok, lata weno lubay 23ya mahapul an ipadalan yuh apuy ta mibilang dan malini. Ya mahapul pay an maduyagan datuwe nah danum an punlinit mibilang dan malini. Mu nada ken maghob ya mahapul an hay danum ya abuy usalon an punlini. 24Ya hay aton yu nah mikapitun algo ya ibalbal yuy bulwati yu ta mibilang kayun malini ta mabalin an humgop kayuh kampu taku.”

25Kanan APU DIOS ke Moses di 26“Mahapul an bilangon yun da Eleasar ya nadan mangipangpanguluh tatagun am-in nadan naalah gubat takon nadan balud ya aaggayam. 27Godwaom ta idat muy godwana nadah tindalu ya nan godwana ya idat mu nadah tatagu. 28Mu hay mamangulun atom ya umala kah hin-oh-ah hinlilimanggatut an balud, baka, kabayu, kalnero ya gulding ta idat mun ha-on. 29Idat mun Eleasar an padit iappit nan ha-on. 30Ya nan midat nadah tatagu ya bagik di hin-oh-ah hinnanaliman balud, baka, kabayu, kalnero ya gulding. Dadiye ya idat mu nadah holag Libay an mumpaptok tuh Tabernacle.” 31Ot un-unudon da Moses ke Eleasar hidiyen kinalin APU DIOS.

32Datuwey bilang di inalan nadan tindalu: hay lakin kalnero ya 675,000, 33hay bulug an baka ya 72,000, 34hay lakin kabayu ya 61,000 35ya hay binabain balud an ugge inhuyop di lalaki ya 32,000.

36Hay kagodwan diyen natdaan an nidat nadah tindalun nakigubat ya 337,500 an kalnero 37ya niappit ke APU DIOS di 675, 38hay baka ya 36,000 ya niappit ke APU DIOS di 72, 39hay kabayu ya 30,500 ya niappit ke APU DIOS di 61, 40hay balud an binabain ugge inhuyop di lalaki ya 16,000 ya niappit ke APU DIOS di 32.

41Ot idat Moses ke Eleasar an padiy bingay APU DIOS mipuun hi intuguna.

42Hanan inappil Moses an nidat nadah tatagu 43ya 337,500 an kalnero, 4436,000 an baka, 4530,500 an kabayu 46ya 16,000 an binabain ugge inhuyop di lalaki. 47Ya in-appit Moses ke APU DIOS di hin-oh-a hi hinnanaliman balud ya aggayam ot idat na datuwe nadah holag Libay an mumpaptok nah Tabernacle. Inat Moses am-in datuwe te hidiyey kinalin APU DIOS an atona.

48Hanadan opisyal ya ap-apun di tindalu ya imme dan Moses 49ot kanan day “Apu, binilang min am-in nadan tindalu mi ya wada dan am-in. Maid di nama-id takon di oha. 50Kinali in-ali min iappit ke APU DIOS datuwen balituk an padang, mihuklub hi takle, hay singsing, hay hingat ya banggol an inala mih gubat ta pangipatibo mih pumpasalamat min maid ke dakamiy nate takon di oha.”

51Ot dawaton da Moses ke Eleasar an padi dadiye nadah aap-apun di tindalu. 52Hay dam-ot dadiyen balituk an in-appit dadiyen aap-apu ke APU DIOS ya nahawwal hi duwan gatut an kilo. 53Am-in nadan tindalu ya inala day bingay da nadah inala dah gubat. 54Dinawat da Moses ke Eleasar nadan balituk an indat nadan aap-apun di tindalu ot ie da nah Tabernacle ta panginomnoman APU DIOS nadah holag Israel.