1Kanan APU DIOS ke Moses di 2“Piliyom di hin-oh-a nadah himpulut duwan holag Israel ta diday ipaem an e munsiim nah bobled Kanaan an idat kun dakayu.”

3Ot aton Moses di kinalin APU DIOS. Intud-ak nay himpulut duwan linalakin mangipangpangulu nadah holag Israel an inumga dah did Paran an nungkampuwan da. 4Datuwey ngadan da: hi Sammua an imbabalen Sakkur hi holag Reuben, 5hi Saphat an imbabalen Hori hi holag Simeon, 6hi Kaleb an imbabalen Jephunneh hi holag Judah, 7hi Igal an imbabalen Joseph hi holag Issakar, 8hi Hoshea an imbabalen Nun hi holag Eplaim, 9hi Palti an imbabalen Raphu hi holag Benjamin, 10hi Gaddiel an imbabalen Sodi hi holag Sebelun, 11hi Gaddi an imbabalen Susi hi holag Manasseh an imbabalen Joseph, 12hi Ammiel an imbabalen Gemalli hi holag Dan, 13hi Sethur an imbabalen Michael hi holag Asher, 14hi Nahbi an imbabalen Bopsi hi holag Naptali, 15ya hi Geuel an imbabalen Maki hi holag Gad.

16Danae nadan intud-ak Moses an e nunsiim nah boblen pangayan da. Ketuwen tiempo ya hinannotan Moses di ngadan Hoshea an imbabalen Nun hi Joshua.

17Handih nangitud-akan Moses ke dida ya kananan diday “Ume kayuh nangappit hi north an mundalan kayud Negeb inggana nah nangappit hi south di Kanaan ya madagga kayu nah mabilid an boble. 18Ta tibon yuy ine-en diyen boble ya nadan bimmoble hin dakol weno oh-ohha da ya hin nal-ot da weno adi. 19-20Tibon yu boy ine-en nan boble hin maphod weno adi. Ya tibon yu hin naalad weno ugge. Tibon yu bo nan luta hin maluwab di mitanom weno adi ya hin dakol di kaiw. Ya deket mibangngad kayu ya adiyu ilah-on umianamut hi bungan di bungbunga-an hidi.” (Kediyen tiempo ya nalappuwan an mal-um di grapes.)

21Imme dadiyen linalaki ot impalpu dan nun-ang-ang nah adi maboblayan ad Sin hidid Kanaan ingganad Rehob an nih-up ad Hamat. 22Numpae da ni-an nah nangappit hi north ot mundalan dad Negeb ot ahida umed Hebron an numboblayan da Ahiman, hi Seshai ya hi Talmai an holag di o-ongal an tatagun kanan dan Anakim. (Hay Hebron di namangpangulun nakapyan boble hi pitun toon ot ahiy Soan an bobled Egypt.) 23Handih imme da nah nundotal an kanan dan Eskol ya immala dah himpulngut an grapes ya makaddam-ot ta mahapul an iattang di duwan tagu. Ya immala da boh pomegrenate ya fig ot ianamut da. 24Nginadanan dadiyen holag Israel hidiyen nundotal hi Eskol an hay kibalinana ya napulngut, te hidiy nangal-an da nah himpulngut an grapes.

25Nala-uy nap-at an algon nunsiiman da ot mibangngad 26dad Kades ad Paran an kawad-an da Moses ke Aaron ya nadan ibbadan holag Israel. Kinali da nadan inanang-ang da ya impatibo da nadan bungan in-anamut da. 27Kanan dan Moses di “Imme kami nah boblen nangitud-akam ke dakami ya tinibo min makaphod ya makatmol ya maluwab di mitanom hidi ya dakol di iyyukan, ya dehtu day in-anamut min bungan inilpu mihdi. 28Mu nadan tatagun numbobleh di ya nungkal-ot da ya ambilog di boble da ya nahamad di alad na. Ya katatakut te wada day o-ongal an tataguh din holag Anak. 29Hanadan iAmalek ya numboble dad Negeb. Ya nadan Hittite, Jebusite ya Amorite ya numboble da nah mabilid hidi. Ya nadan iKanaan ya numboble dah pingngit di baybay ya nadah pingngit di Wangwang an Jordan.”

30Mundiklamu nadan holag Israel ke Moses mu impadin-ong Kaleb didan kananay “Etaku ot ta etaku gubaton dida ta ditakuy mumbobleh di ot nunna-ud an apputon taku dida.”

31Mu nadan ibbanan e nunsiim ya kanan day “Adi taku man anhan pakaapput ke dida te matibon ongal di kabaelan da mu ditaku.” 32Ot ihinap da nan adi makulug mipanggep nah boble nadah ibba dan holag Israel. Kanan day “Adi maphod nan luta te kumudang di ibungan di mitanom hi kanon am-in di mumbobleh di. Ya o-ongal nadan tatagun numbobleh di. 33Dehdi da bo udot nadan giant an holag Anak. Ta hay panibo mih adol mi ya kay kami ba-atong an i-itay ya nunna-ud an athidi damdamay panibo dan dakami.”