1Nomnomom ke bo nan aggayam an Lebayatan, kon kabaelam an mampap kediyen katatakut an aggayam nah baybay ta bunwitom weno bobodam di hungahung na? 2Ya kon kabaelam an tudukon di olong nat gakdam ta maguyud, weno tuwikom hi pahul muy pangal nat 3mumpahpahmok mon he-a? 4Kon tobalona nin an mummuttatyun he-at inggana? 5Kon mabalin an ayumom, umat hi hamuti ta idat muh iimbabalem ta ay-ayyamon da? 6Ya kon mabalin an igattang mu nadah munggattang ta gogodon dat igattang dah tendaan da? 7Kon mipanot di pahul hi bolat na ten tanodon? 8Ipatna ken di tagun liputan hidiyen katatakut an aggayam ya hidiyey poppog di nitaguwan diyen tagu. 9Adinadaman madpap te takon di pangang-angan di tagu ke hiya ya matu-i gapu takut na. 10Athidi ken maid di mabalin an mundistulbu kediyen Lebayatan ya dahdiy mabalin an makihanggan ha-on? 11Dahdiy mabalin an mangipatnan mungngohen ha-on yaden adi makastigu? Ha-oy di nunlutun am-in hi nganneh diye.

12Pinhod kun ipainila an nakal-ot ya ongngal nan Lebayatan. 13Ya maid di mabalin an mamik-i weno manuduk hi bolat na. 14Ya maid boy mabalin an manakang hi tokona te katatakut an abuy bob-ana. 15Hanadan naod-oddan hiphip nay kay happiyona. 16-17Nakaddummit dan adi maappil, kinali takon di dibdib ya adi humgop.

18Deket himmakti ya mumbonyag di matanan maka-ingit an umat hi ingit di algo nah mungkabigat. 19Ya bumudal di kay apuy ya balah tokona. 20Mamuddal boy ahuk hi olong nan umat hi ahuk di mungkaghob an maatan holok. 21Padalangon di yahyanay bala ne bumudal di dalang di apuy hi tokona.

22Ongal di bagang na ya katatakut di ang-ang na. 23Ya makulhin am-in di adol nan kay gumok. 24Ya mialig nah makakkulhin batuy puhu nan adin-abu tumakut. 25Deket immina ya takon nadan kalkal-otan ya tumakut da ya maid di maat da hin mumpalaghik. 26Adinadaman maliputan hidiyen Lebayatan te takon di ispada weno pahul ya adi gumla. 27Deket iusal di gumok ya giniling ya maid di hilbina te kay da dagami ya kay da nadunut an kaiw. 28Adina ikinay pana ya deket binayyabe da ya kay dagami ya abu nan bayyaben niwelen hiya. 29Adina bo ikinay pat-u ya kay na katataw-an di pahul an mitanod ke hiya. 30Makakkulhiy hiphip di putuna ya matadom ta kay naaladu nan lutan kumadapana.

31Deke bot mungkekeh dalom di baybay ya kiwakiwona nan danum ta kay munluluwag 32ya kay mumbobbolan upag. 33Maid di takut na ya maid di udum an aggayam tuh lutan umat ke hiya. 34Hiyay ap-apun am-in di mailom an aggayam. Kay maid di bilbilang di udum an aggayam hi panibona te namahig di pumpahhiya na.”