1Ha-oy ya gumayonggongak an munnomnom kediye! 2Donglon yu nan kidul an kalin Apu Dios. 3Pabudalonay kil-at hi kabunyan ne ipaenan am-in tuh luta. 4Umipamodwong di kalina an umat hi kidul. 5Om, umipamodwong di kalina ya adi maawatan nan ongal an kabaelana.

6Mandalanay dalalu ya udan ta mag-a dah luta. 7Kediye ya itikod ni-an di tataguy ngunu da te kediyey pangipatib-anan didah ongal an kabaelana. 8Hanadan mailom an aaggayam ya eda muntalu nadah mabatu ya nadah eda kitaluwan. Hay ohan kibalinana ya “nada ken babaka ya inila da pe tuwalin mangaliy puwok.” 9Hi Apu Dios di mangipaalih puwok ya namahig an kotol. 10Deket yimmahyah ya mumbalin di danum hanadah wangwang ya wa-el hi dalalu. 11Ha-adanah danum nadan kulabut ya unnudanah kil-at. 12Deke bo ya mandalana nadan kulabut ta mumbinangngadan da on imme da nah pangipaeyanan dida tuh luta. 13Hin-uddum on ipaalinay udan ta pananum nah lutat pangipatibonah pamhod na mu hin-uddum on ipaali nat pangastigunah tatagu.

14Kinali op-opya ka Job ya mundongol ka. Nomnomom nadan umipamodwong an inainat Apu Dios. 15Kon inilam hin nganney innun Apu Dios an mummandal hi kil-at ta maukat nah kulabut? 16Ya kon maawatam hin nganney innun di kulabut an miha-ha-ad hi kabunyan? Hidiyey kitib-anan hi Apu Dios ya nakala-ing ya impakainnilan am-in. 17Munholholtap di tagu gapuh namahig an atung an ialin nan dibdib an malpuh south. 18Adim kabaelan an mamaddang ke Apu Dios an mangibiklag hi kabunyan ta hay ang-ang na ya kay giniling.

19Hay punnomnom muh adol mu ya nakanginnila ka. Deket makulug an nakangnginnila ka ya tuttuduwan dakami boh moh ihumang min Apu Dios. Te maid di inila mih ihumang min hiya. 20Job, kon waday mabalin an mituttudu ke Apu Dios? Ya kon ilamangan di taguy biyag nat atonah diye? 21-22Madayaw an abuh Apu Dios. Humihhiliy dayaw nan maid di pangiingngohan. Umat nah algon adita pakaang-ang ten intayyap di dibdib nan kulabut an nihani ot mapukyahan te humili mu humihhili pay di dayaw Apu Dios. 23Bokon abunah diye te adi taku pakaawat nah ongal an kabaelanan mangat hi am-in. Mu hiya ya limpiyun adi ditaku paligaton. 24Kinali takutan am-in di tagu ya dayawon nadan makulug an nanomnoman an tatagu.”