1Kanan bon Elihuy 2“Dakayun nakala-ing ya nakannomnoman, donglon yu tun kalyok. 3Hay toko ya tamtamona hin maphod nan makan weno adi. Athidi boh ingan donglona hin maphod nan kali weno adi. 4Wadan ditakuy munnomnom hin nganney niptok ya ditakuy manginila hin nganney maphod. 5Hi Job ya kananay ‘Maid di bahul ku ya adi maandong di punhumalyan Apu Dios.’ 6Kanana boy ‘Maid di bahul ku, mu kanan day makallangkakak. Adi maagahan tun dogok yaden uggeyak nunliwat.’

7Maid di ohan tagun umat ke Job an maid di lispituna ke Apu Dios. 8Pinpinhod nan maki-kie ya makihanayhayyup hi gaga-ihon tatagu. 9Kananay maid di hilbinah pangun-unudanah pinhod Apu Dios.

10Donglon yuy kalyok, dakayun inilanan mun-awat. Am-in di tagu ya inila dan adi munliwat hi Apu Dios an Kabaelanan am-in. 11Hay atona ya idat nay lebbeng nan midat hi ohan tagu mipuun hi inat diyen tagu. 12Hay kakulugana ya adinadaman e aton nan Dios an Kabaelanan am-in di gaga-iho. Ya maandong di punhumalyanah tatagu. 13Maid di nangipaboltan hi ongal an kabaelan Apu Dios te wada tuwalin hiyah diye. Maid pay di nanuddun hiya ta hiyay ukod hi kabobboble tuh luta. 14Gulat nat bangngadona nan biyag an inyahyana ke ditakun tatagu ya 15nunna-ud an mate takun am-in ta mumbalin takuh dap-ul.

16Aga, mundongol kan ha-on hin nalaing ka ya nanomnoman ka. 17Hi Apu Dios ya waday lebbengnan mun-ap-apu te hiya ya limpiyu. Tipe udot ta kanam di nabahulan? 18Hiya ya boh-olanay papatul ya aap-apun kananay ‘Gaga-iho kayu, adi kayu limpiyu.’ 19Adina ipahhig di impaminhod nah aap-apu weno kakadangyan te takon nadan nawotwot ya lintuna damdama dida. 20Hay udum ya hingkakattang on nate dah gawan di hilong. Takon di aap-apu ya deke on nakaan dah pun-ap-apuwan da mu bokon gapuh aton di tatagu.

21Tibtibbon Apu Dios di pumbibiyag di tatagu ya am-in di ngannen at-atton da. 22Maid di ohan gaga-ihon tagun ena italuwan hi Apu Dios nah munhihhilong. 23Ta hidiye nan adi mahapul an manahmahan Apu Dios di ine-en di tagu on ahi nahumalya. 24Ya adi mahapul an munmahma on ahina kinaan di ohan ap-aput ihannot nay udum. 25Man-uke ya inilana tuwaliy pangi-e da, kinali apputona ya dadagona dida nah hilong. 26Ipatibonan kastiguwonay gaga-ihon tatagu 27te intikod dan mangun-unud ke hiya ya inwalong day tuguna. 28Paligaton da nadan nawotwot, ta hidiye nan mumpahpahmok dan Apu Dios on binaddangana dida. 29Mu deket pamgan Apu Dios di op-opya, kon dahdiy mangibaag ke hiya? Maid di maat di tagu hin adi hangudon Apu Dios. 30Muden adina iabulut an mun-ap-apu nadan adi mangun-unud ke hiya ta adida paligligaton di tatagu.

31He-a, Job, daan mot kalyom ke Apu Dios an abulutom an nunliwat ka ya itikod mu mon munliwat. 32Weno kanam di ‘Nganney numbahulak? Kalyom ta adik mo aton.’

33Mu kon baliwan Apu Dios di ninomnom nan aton ta iunnud na ni-ahan hi pinhod mu? Muden inwalong mu met boppoh Apu Dios. Nangamung kah punnomnom mu, bokon ha-oy di mumpili. Aga, kalyom ke dakami hin nganney punnomnom mu. 34Am-in di mundongol ke ha-on takon di nanomnoman ya kanan day 35‘Man-uket athidiy pungkalkallin Job ya naka-ignolante ya maid di kibalbalinan di kalkalyona.’ 36Deket pakannomnomon yu nadan kinalikalin Job ya matibo yun umat hi pungkalkallin di gaga-ihon taguy pungkalkallina. 37Makattibon nakaliwwat bo tuwali yaden taltalanggaana pay hi Apu Dios.”