1Mu ad uwani ya tanaltalanggaanak nadah uung-ungan maid di hilbin di aammod dan adik pay pundinolan didan bumaddang nadah ahuk an mun-adug hi kalnerok. 2Maid di hilbi da te maid di ibaddang dan ha-on. 3Gapu boh nahalman an inagang da ya munhawwangan dan manamak hi makan takon mo anhan hanadah adi maboblayan. 4Kumpulmiy mabalin an makan ya alan da takon di lamut di kaiw an makallamhit ya alan dat kanon da. 5Nadog-al dah numboblayan da ya puntukukan di tatagu didan kay da mangako. 6Ad uwani ya eda numboble nadah liyang hi dopla ya nadah mabatu. 7Maamuamung dan e mihikug nadah yimmobyob an bilau ya kay da aaggayam an mun-olmom. 8Maid di mangabulut hi pakiboblayan da te maid di hilbi dah panibon di tatagu.

9Ya ad uwani ya taltalanggaanak hi iimbabale dah malalaon kanta mipanggep ke ha-on. 10Pihulonak ke dida ya mih-up da ya abun ha-on ta tuppaan day angak. 11Man-uket athitu moy aton dan ha-on ya impumbalinak ke Apu Dios an nakakkapuy ya impumbalinan maid di kabaelak. 12Labanonak ke dida yaden deya pe tuwalin maid di maat ku. Indadaan da pay mo anhan di kay bitun kaknaak. 13Paddungnay hinaniyan day dalanok ya aton dan am-in di mabalin an aton ke ha-on ta mamam-ay ligat ku yaden inila dan maid di mamaddang ke ha-on. 14Kahihahawwanganay umalin manadag ke ha-on nah tiempon waday ligat ku. 15Anukmunok di takut kud uwani. Maid moy kinadangyan ku ya kababain di numbalinan di nitaguwak.

16Ad uwani ya dandaniy katek. Maid di mangalubyag ke ha-on tuh namahig an punholholtapak. 17Deket hilong on namahig di hakit di adol kun munnananong an adi anhan matiktikod hi ittay. 18Kay linabnit Apu Dios di bulwatik ta kayak punhokol. 19Paddungnay inweleyak ke Apu Dios hi pitok ta deyan kayak mo anhan lugit.

20Mumpahpahmokak anhan ke he-a, Apu Dios, mu adiyak baddangan. 21Maid mo anhan di homok mun ha-on an paligligatonak gapuh ongal an kabaelam. 22Paddungnay impaalim di katatakut an puwok ot itayyapak. 23Apu Dios, inilak an ad uwaniy poppog di biyag ku. Man-upo te hidiye tuwaliy maat am-in hi tatagu.

24Tipe bo ahan, Apu Dios, ta athituy atom ke ha-on? Yaden deya pe tuwalin nadadagak an abunay mumpahpahmokak ke he-a. 25Kon uggeyak nakikokoga nadah tatagun naligatan ya kon uggeyak inu-umyung gapuh punholholtapan nadan mahmok an tatagu? 26Namnamaok hi biyag kuy an-anla ya linggop, mu kon ot hay ligat ya bulubulun di immalin ha-on. Ya namnamaok an pat-alanak ke Apu Dios, mu impaalina ot boy tapol. 27Abuna pe kattog di danag ya holholtap di hanghanggaok hi kabigabigat. 28Paddungnay adiyak mapat-alan nah algo te maid anhan di an-anlah biyag ku. Ta deke pe kattog ta immeyak nah kaam-amungan di tatagu on hay mumpahpahmok an mumpabaddang di ek aton hidi. 29Hay gangon di kalik ya kay goh-om di ostrich weno jakal. 30Ya ngimmetet di bolat ku ya mun-aatung di adol ku. 31Hay danongdonglok ad uwani ya mun-iyo ya mungkoga, bokon mo pun-an-anlaan.