1Inilan di tatagun mumminas hi silber ya inila dan munmahmah balituk. 2Inila da bon athidi metlaing di aton dah gumok an ka-utan day luta ya kaanon day gombang nah batu. 3Ie day dilag nah dalom di lutan munhihhilong ta ka-utan day nabalol an babatu. 4Mange dah dallodallom di luta nah adi pakadatong di tagun usalon day linubid an umeh di. 5Hay tap-on di luta ya tummol di nitanom an kalpuwan di makan umat hi tinapay, mu hi dalom di luta ya kay waday apuy an mun-ayug nah batun 6niha-adan di balituk ya nadan udum an klasen nanginan batu. 7Maid di pakatibon dadiyen nabalol an odon takon di gawwang ya takon nadan hamutin nalaing an mun-anup. 8Maid boy layon weno kumpulmi nadah katatakut an aggayam di mundalan hidi.

9Hay tagu ya kabaelanan buhakon di ongal an batu ya kabaelanan ka-utan di puun di bilid. 10Ya dakol di nanginan batun mahamak dah pungka-utan da nadah mabatu. 11Takon hi puun di wangwang ya hamakon dat ibudal day nganneh diyen nabalol an wadah di.

12Kabaelan di tagun hamakon danae, mu kon kabaelan dan hamakon di laing ya pun-awat? 13Maid di nanginilan nakaballol an abuy laing ya adi mahamak hi boblen di matagu. 14Ya adi e mahamak nah dallodallom di baybay.

15Adinadama bon magatang, takon di balituk weno silber di pamayad. 16Adinadaman e miingngoy balol di laing nah nakammahman balituk an nalpud Ophir weno nah nanginan batu an onyx ya saphire. 17Nabalbalol di laing mu hay balituk, takon nan kanginaan an nakapyah balituk weno crystal. 18Ong-ongal di balol di laing mu hay balol nadan nakangnginan batu an coral, jasper ya ruby. 19Ya adinadaman mihannot di laing hi topaz an nalpud Cus ya adinadaman magatang hi nakammahman balituk.

20Dahdiy nalpuwan di laing ya pun-awat? 21Ugge nipatibon ditakun tataguy laing ya ugge nipatibo nadah hamutin matadom di matada. 22Mu hay kate takon nan dumadag ya kanan day dingngol da kanuy panamakan kediyen laing.

23Mu hi Apu Dios ya abuy nanginilah panamakanah laing 24te hiya an Dios ya kabaelanan tibom am-in di luta ya tibtibbonan am-in di wadah da-ul di kabunyan. 25Indat Apu Dios di olot di dibdib ya lingkud nay poppog di baybay. 26Ya hiyay kon nomnom hin daanay pangipaeyanah udan ya kidul. 27Handih nangatanan dadiye ya inila na tuwaliy mipanggep hi laing ya hay kinaimportantena. Tobalonan hiya peman an importanten abuy laing. 28Ya hituwey kanan Apu Dios am-in hi tatagu: Hay pangun-unudan ke Apu Dios di ustun laing. Ya hay pangiwalongan hi gaga-ihoy kawadaan di ustun pun-awat.”