1Hinumang Job an kananay 2“Hiyah, makaphod ka te ongal di baddang mun ha-on an nakakkapuy an tagu. 3Maphod ta tumugun ka ya umibingay kah inadal muh tatagun umat ke ha-on an makudang di nomnom na. 4Dahdi bo udot di nangngolam ke naen makakkaphod an tugun? Nganneh diyen kimmalin nihkop ke he-a?

5Hanadan linnawan di nungkakate ya nunna-ud an munggagayonggong dah dih boblen di nate nah dallom di baybay. 6Hidiyen boblen di naten kadadagan ya maid di nihani ya ugge nitalu ke Apu Dios 7an nangibiklag nah north an kabunyan ya nangiha-ad hi lutan kay nuntayun. 8Winadan Apu Dios di danum hanadah kulabut yaden adi mikuyag takon di madam-ot. 9Kay bo inlibbut Apu Dios di kulabut nah bulan ta adi matibo. 10Kay nan poppog di baybay di nangiptokan Apu Dios hi pun-appilan di mapat-al ya hilong. 11Deket bimmoh-ol hi Apu Dios ya paddungnay gumayonggong nadan tukud di kabunyan. 12Gapuh ongal an kabaelana ya impadin-ong nay baybay ya gapu boh laing na ya pindit na nan katatakut an aggayam nah baybay. 13Ya gapuh kabaelan di yahyana ya lintunan makaphod di ang-ang di kabunyan ya pinatena nan ongal an katatakut an ulog. 14Datuwen inat nan umipamodwong ke ditaku ya kittakittay an kitib-an di ongal an kabaelana. Dahdiy makaawat kediyen ongal an kabaelana?”