1Hinumang Sophar an iNaamah hi Job an kananay 2“Mabulunak nah kinalikalim, kinali mapilitak an kumali. 3Iniippol kuy pumpadngol mu, mu mahapul mon humangon daka.

4-5Nipalpu handih naltuwan di luta ya inilan am-in di tatagun nakatang ya abuy pun-an-anlaan di nakaliwwat an tagu. 6Takon di ongal di kabaelana ya takon di namahig di pumpahhiyanan datnganay kabunyan 7ya kay dap-ul an itayyap di dibdib ta ahi hamahamakon nadan nanginilan hiyan kanan day ‘Daan nin di nangayana?’ 8Ahi maid mon e matibo, umat hi in-inop nah hilong an mama-id. 9Takon nadan gagayyum na ya kapamilyana ya maid moy eda pangang-angan ke hiya. 10Ta mahapul an ipabangngad nadan holag nay nganneh diyen inalana nadah nawotwot. 11Kat-agu ya makodhol hidiyen tagu, mu magagalan mate ta mumbalin hi luta.

12-13Pun-amlonganay gaga-iho, umat hi pun-am-amlongan nah mahong-on makan. 14Mu mumbalin an mapait hi putuna, umat hi pait di kodot. 15Paddungnay iuta nay inakoako na te paukaton Apu Dios hi putunat bangngadona. 16Ya paddungnay ukmunonay gitan di ulog ta ikatena. 17Ta adina mo gangganason nan mahawwahawwal an lanan di oliba ya gatas ya iyyukan. 18Maid di hilbin di nun-aatuwana ya maid di gun-udona 19te tinalatalam nay nungkawotwot ot pakiala nay babale da. 20Hay naagum an tagu ya pinhod nan ibagin am-in di nganneh diyen maid di kanana on abu mo. 21Mu hay tagun athidi ya loktat ta nama-id di kinadangyana takon di hay kanona. 22Ad uwanin kimmadangyan ya umaliy ligat an manadag ke hiya. 23Hana ot ta ipaalin Apu Dios di nahalman an punligatana gapuh namahig an boh-ol nan hiya. 24Takon hin kananat ipatna nan ibtikan di ipaalin Apu Dios an punligatana ya patayon metlaing Apu Dios. 25Kay mungkipanot hi adol nay pananat muntottod di dalana ta loktat mo ya namahig di takut na.

26Ahi madadag am-in di nakaballol an limmunah nunhituwana te ipaalin Apu Dios di apuy ta maghob da. 27Hanadan wadah langit ya luta ya ipainila dan naliwat hidiyen tagu. 28Gapuh boh-ol Apu Dios ya madadag am-in di kinadangyana, umat hi kadadagan di bale ten nalbongan di luta. 29Maat di athidi nah gaga-ihon tagu te hidiyey kinalin Apu Dios.”