1Nadismayaak ya mungkapoppog di biyag ku ta dandaniyak mon milubuk. 2Deyan nalikkub hantudan tatagun namahig di panaltalangga dan ha-on.

3Apu Dios, itakdogak anhan ke he-a ta iuh-um an maid di bahul ku, te maid di udum an mangitakdog ke ha-on takon di oha. 4Adida kulugon di kalyok te mina-id muy pun-awat da, mu mahapul an ipatibom ke didan nihalla da. 5Hay ohan tagu ya ihdul nay gayyum na gapuh nganneh diyen maalana muden ahi munholholtap di iimbabalena gapun diyen inat na.

6Ad uwani ya in-abulut mun tanaltalanggaanak hi tatagu ya puntuppaan day angak. 7Adi mo tumittiboy matak gapuh kogakogak. Ya nakakkuugak an kay mo a-oy ang-ang ku. 8Hanadan maphod an tatagu ya namodwong dah panib-an dan ha-on. Dida ya bumobboh-ol da nadah adi mangulug ke Apu Dios. 9Man-uke ya nadan maphod an tatagu ya mungkihamad di pangun-unud dan Apu Dios.

10Mu dakayu ke ya makulug an maid ke dakayuy nalaing ya nanomnoman. 11Ha-oy ke ya mungkapoppog di biyag ku yaden maid di numbalinan di planuk ya maid moy namnamak. 12Mu dakayu ken gagayyum ku ya kanan yuy mapat-al di hilong ya kanan yu boy tuwen pumat-al. Mu ha-oy ke ya inilak an nanongnan wadaak hi tapol. 13Maid moy ek namnamaon hi pangayan hin bokon ya abu nah boblen di nate ta mahmahhuyopak nah munhihilong. 14Ta paddungnay hi ama nan lubuk ya paddungnay hi ina ya tutulang ku nadan bibigin mangan hi adol ku. 15Ot nganne moy namnamak? Ya dahdiy umidat hi namnama ke ha-on? 16Kon nganney namnaman magun-ud ku hin mumbalin nan adol kuh dap-ul nah boblen di nate?”