1-2Am-in nadan kinali yu ya dingngol ku tuwali handi. Maawatak am-in, umatak ke dakayu ya nakanginnilaak damdama. Kon pangali yu on makudang di inilak mu dakayu? 3Hay pinhod kun pakihummanganan ya hi Apu Dios an Kabaelanan am-in, bokon dakayu. Pinhod kun hiya mismuy pundiklamuwak. 4Dakayu ke ya langkak di kanalyon yu mipanggep ke ha-on, umat kayu nadah mun-agan maid di inagahan da takon ni-moy oha. 5Kudukdulnay op-opya kayu ta adi mainilan maid gayam di inila yu. 6Aga, mundongol kayu ta kalyok di diklamuk.

7Tipet munlangkak kayu? Kon pangali yu on itakdog yuh Apu Dios hi pangalyan yuh langkak? 8Ya kon dakayuy makihanggah kasun Apu Dios? 9Kon makulug an maid di matibon Apu Dios hi gaga-ihon dakayu? Ya kon pangali yu on mabalin an lukuwon yuh Apu Dios, umat hi punluku yuh tatagu? 10Takon di italu yuh nomnom yuy adi maandong an pangi-e yu ya boh-olan dakayu. 11Kon adi kayu tumakut hi kinatag-en Apu Dios? 12Maid di hilbin di kanalyon yu, umat hi dap-ul an maid di hilbina ya umat hi pulan bangan kapinna-i.

13Op-opya kayu ta ha-oy poy kumali. Nangamungak, takon di nganney maat ke ha-on. 14Nidadaanak hi ngannen maat ke ha-on. 15Takon di patayonak ke Apu Dios hi pundiklamuwak ke hiya ya takon di adik namnamaon an mabaddanganak, mu ta kalyok di diklamuk ke hiya. 16Mu madinolak an mihwangak te inilak an maid di bahul ku te kon gulat na ya adinadaman eyak makihanggan hiya.

17Donglon yu ke tun iesplikar ku. 18Man-uket nakadaddaanak an mangalih diklamuk ya inilak an niptokak. 19Dahdiy mabalin an makihannun ha-on mipanggep ketuwe? Deket waday mahamak yuh kitib-anan nihallaak ya takomboy pamgak di op-opya inggana mateyak.”

20Ot kumalih Job ke Apu Dios an kananay “Apu, duwa ya abuy ibagak ke he-a ya deket tobalom ya kalyok am-in ke he-a, maid di italuk. 21Itikod mu anhan, Apu Dios an mangastigun ha-on ya adiyak anhan patatakuton. 22He-ay mamangulun kumalin ha-on ta humangok, weno iabulut mun kumaliyak ta humangom. 23Nganney nunliwatak ya nganney gaga-ihon inat ku? 24Tipet inwalongak ke he-a? Tipet kayak buhul muh pangat mun ha-on? 25Ya tipet tanaktakutonak yaden maid di hilbik an umatak nah tubu ya nah namag-anan an dagamin tanogtogom.

26Dakol di ipabahul mun ha-on ya pakidalat mu nadan inat ku handih kaungak. 27Kay mu binangkilingan di hukik ya halipat-am di kadligak takon di gattinok. 28Mun-ul-uleyak an maten umatak nah mungkadunut an kaiw ya umatak nah luput an kinalakalat di balaingan.