1Himmumang hi Sophar an iNaamah an kananay 2“Dahdiy manumang ke datuwen nalgonalgom an kinalim? Kon hay kadakol di kalyon di taguy kitib-anan maid di bahul na? 3Kon pangalim, Job, on adi kami pakahumang ke danaen kinalim? Ya kon pangalim on pamga miy op-opyah panaltalanggaam ke Apu Dios? 4Hay kanam, Job ya niptok di punnomnom mu ya makaphod kah hinangngab Apu Dios. 5Kumali kumah Apu Dios ta kalyonay wadah nomnom na. 6Ya ipainilana kuma bon he-ay ustun laing. Man dakol di ugge taku inila ya adi taku maawatan. Hay kakulugana ya kinulangan Apu Dios di kastigum mu nan lebbeng na ot tuwalin pangastigunan he-a.

7Kon kabaelam udot an inilaon nadan ugge impainilan Apu Dios an Kabaelanan am-in? Ya kon kabaelam udot an inilaon am-in di mipanggep ke hiya? 8Adi, te adi maawatan hi Apu Dios. Hay inilana ya adi malkud umat hi kinadawwin di luta ya kabunyan ya umat boh kinadallom di lutan adi malkud. Kon dahdi kan niingngoy inilam hi inilan Apu Dios? 9Hay inilana ya adi malkud, paddungnay ambilbilog mu hay luta ya ambilbilog mu hay baybay. 10Kon hin kananat ipadpap dakan hiya ta ie dakah korte ya dahdiy mabalin an mangipatikod ke hiya kediyen atona? 11Man-uke ya inilana hin dahdin taguy maid di hilbina ya halipat-anay punliwatan diyen tagu. 12Kon mabalin an mun-impay kabayuh tagu? Athidi bon adi mabalin an manomnoman ya lumaing nan tagun makudang di nomnom na.

13Kon gulat nat maphod di wadah nomnom mu ya puhum ya mundasal kan Apu Dios. 14Ya muntutuyu kah liwat mu ya itikod mun mangat hi gaga-iho 15ta pumhod ka kaya ta mipatibon maid di liwat mu. Loktat kaya ya tumulid kan adika mo tumattakut. 16Mala-u kayah tuwen ligat mut kal-iwam, umat hi kala-uwan di danum nah da-ul di langtay. 17Ta hay nitaguwam an mialig an tapottapol ya mapatpat-al mu nah maal-algo ya pumat-al umat hi pumat-alanah biggatna. 18Ipaptok dakan Apu Dios ta tumulid ka te waday namnamam ya mun-iyatu ka ya luminggop ka. 19Adika mo tumakutakut hi buhul mu ya dakol di mumpabaddang ke he-a. 20Mu nadan gaga-ihon tatagu ya maid di namnama dan mihwang. Abunay katen namnamaon da.”