1-2Himmumang hi Bildad an iSuah an kananan Job di “Kon nagibbu mo nan nalnalgom an kanalyom? 3Hi Apu Dios ya maandong am-in di pangat na. Adina ibahhon aton di niptok. 4Wadan nunliwat tuwali nadan iimbabalem ke Apu Dios ot kastiguwona dida te hidiyey lebbeng nan maat. 5Mu takon di athidi ya mumpakumbaba kan Apu Dios ta mumpahpahmok kan hiya. 6Te deket makulug an maphod kan tagu ya baddangan daka ya pabangngadonay pamilyam. 7Am-in nadan kinadangyan mun natalak ya maid di kipaddungana nah idat Apu Dios ke he-an hannot na.

8Nomnomom key laing di tagu handih done ya nomnomom nadan nganneh diyen makulug an inadal handidan aammod taku. 9Hay tagu ya makudang di inilana ya antikkey biyag nan kay a-o ya abun mala-u. 10Mu takon, donglom ya adalom di ituttudun handidan aammod taku dih done.

11Hay katlubung ya nah mumbabahay kawad-an da te adida mabalin an tumaguh mamaga. 12Deket mamag-anan nan luta ya diday mamangulun makleng, takon di uggeda ni-an nat-ongan. 13Umat ke dadiyen katlubung nadan tatagun mangiwalong ke Apu Dios an mama-id di namnama da. 14Pundinolan da nadan nganneh diyen kapinna-in paddungna nan tawang di kakawwa. 15Te deket id-on kediye ya mag-a ta te adi makodhol an pangid-onan. Athidi boh tinulid an adim id-on kediye te adi mabalin an hodlon daka. 16Hanadan adi mangun-unud ke Apu Dios ya umat da nah maluwab an intanom an namahig di lamut nan ambilog di akyamana. 17Mikayam-ut di lamut dah batu ne niathidin adi mo makaan. 18-19Mu deket nalokha da ya hidiyey poppog di biyag da. Ne hay udum moy tummol nah tinummolan dan kay da ugge tinummol hidi handi.

20Hanada ken nanongnan mangun-unud ke Apu Dios ya adina iwalong dida, mu nada ken gaga-ihon tatagu ya adina baddangan dida. 21Kinali deket mangun-unud kan Apu Dios, Job ya paamlongon daka ya patatawaon daka. 22Mu nada ken buhul mu ya ba-inana dida ya dadagonay nunhituwan da.”