1Kimmalih Eliphas an kananay 2“Job, kon balawom ten kumaliyak? Adiyak pakaippol an ek pamgay op-opya.

3Handi ya oggan ka tumugun ta alubyagom nadan nadismaya ta mundinol dan Apu Dios ya binaddangam nadan nakapuy. 4Kinalyam bo nadan maid di namnama dah nitaguwan da ot tumulid da. 5Mu ad uwanin he-ay munholholtap ya uggem mo inilay atom an mananggah ligat mu. 6He-a bo ya dinaydayaw muh Apu Dios ya maid di numbahulam. Kinali, gulatna ya ong-ongal di dinol mu ya namnamam.

7Nomnomom ke, kon waday ohan maphod an tagun e nakaliggatan? 8Tinibok an hay tagun mangmangngat hi gaga-iho ya gaga-iho boy maat ke hiya. 9Pinghanadi ya dinadag Apu Dios di athidin tagu gapuh boh-ol na. 10Hay athidin tatagu ya kay da layon an mun-olmom, mu paop-opyaon Apu Dios dida ya polagonay bab-a da. 11Ya umat da nah layon an maid key kanon da ya mate da ta miwahwahit di impa da.

12Waday nipainilan ha-on an maid di udum an nanginila te ingkutyam nan nangipainilan ha-on. 13Hidiyen nipainilan ha-oy ya kay lomam an dinistulbu nay hinuyop ku. 14Ya munggagayonggongak te namahig di takut ku. 15Indani ya kay nadibdiban di angak ya nabugitak. 16Natikod nan kay dibdib ya waday inang-ang kuh muntattaddog, mu maid di maptok hi ang-ang na. Indani ya dingngol kun kimmutyam an kananay 17‘Kon waday ohan tagun maid di liwat nan makaphod hi hinangngab Apu Dios?

18Takon ni-mo nadan anghel hi langit ya adi madinol ke dida. 19Kinali kon pangalim on makadinnol hi Apu Dios hi tagun nakapyah lutan nalakan puditon umat hi kulkulap-e? 20Hay tagu ya takon di matagu nah biggatna ya mabalin an mateh kahilongana. 21Ta hidiye nan matey tagun ibati nay limmunah udum an tatagu ya uggena naawatan di ine-en di nitaguwan.’