1Hanadan adi maboblayan ya ahida kay mun-am-amlong te ahi humabung di mitanom hidi. 2Om, humahhabung di mitanom takon di daan hidi nadah adi maboblayan an kay da mungkanta ya muntukuk hi anla da. Ahi makakkaphod di ang-ang dan umat nadah bibilid ad Lebanon ya umat hi kaphod di ang-ang nadan kudal ad Carmel ya Saron. Kediye ya tibon am-in di tataguy dayaw ya kinatag-en APU DIOS an Dios taku.

3Ekayu ta eyu ipainilay mipanggep ketuwe nadah nakakkapuy ya nadah nadismayat patulidon yu dida.* 4Kanan yun nadah madanagan di “Adi kayu madanagan! Ya adi kayu tumakut!† Te umali nan Dios yun mangastigu nadah buhul yu ta ihwang dakayu.”

5Kediye ya tumiboy matan nadan nakulap ya dumngol di ingan nadan nalulok. 6Pumaytuk nadan napilay ya manayo da. Ya pakakali nadan nanganga ta itkuk day anla da.‡ Ya ahi mawaday danum an mun-ayu nadah mamagan adi maboblayan. 7Ahi mumbalin an lobong nadan mamagan malona ya mawaday dakol an ob-ob nadah nakammag-anan an luta. Ahi tummol di holok ya katlubung nah adi maboblayan an kawad-an di mailom an ahu.

8Ahi makapyay kalatah di. Hay ngadana ya “Kalatan di Makaphod an Abu.” Maid di gaga-iho weno makudang di nomnom nan tatagun mundalan hidi, mu abuna nadan makangngun-unud ke APU DIOS. 9Maid di layon hidi ya adi idalan nadan katatakut an mailom an aggayam hidi. Ammuna nadan umanamut an inihwang APU DIOS di mangidalan hidi. 10Idalan hidi nadan inihwang APU DIOS an umanamut ad Jerusalem. Manganamut da yaden pun-itkuk day kanta da gapuh amlong da. Mun-am-amlong dat nangamung an adida mo u-umyungan ya maid moy ligat da.