1Handi ya deket kimmali handidan aap-apud Eplaim ya un-unudon di ibba dan iIsrael dida te lispituwon da dida. Mu indani ya impangpangulun dadiyen aap-apu nadan ibba dan mundayaw hi dios an kinapyan di tagu. Ot hi Baal moy dayawon dan bokon hi APU DIOS. Ta hidiye nan mahapul an makastigu dat mate da. 2Pun-imam-a da bo udot an munliwat an manganapya dah dios dan nakapyah silber. Datuwen dios ya makaphod di nangapyan nan nalaing an mangapya. Ta hidiye nan, namahig peman di pundayaw dan iappitan da ya awalon da dadiyen dios an ing-ingon di baka. 3Dadiyen tatagun mundayaw kediye ya ahida umat nah kulabut ya umat da nah dulnun gagalan mama-id. Umat da bo nah dugin itayyap di dibdib ya umat da nah ahuk hi pun-apuyan an gagala damdaman mama-id.

4Kanan APU DIOS ke diday “Ha-oy an AP-APU an Dios yuy nangipangulun dakayun tumayan ad Egypt. Kon uggeyu inilan adinadaman waday udum an dios an dayawon yu te ha-on ya abu? Ya maid boy udum an mangihwang ke dakayu hin bokon ha-oy ya abu. 5Kon bokon ha-oy di nangipanaptok handidah aammod yu nah adi maboblayan an makamagga? 6Mu handih imme da nah makaphod an boble ot pumhod di biyag da ya kay da mo hiyyahiyyan impakakkal-iwanak ke dida umat ke dakayu. 7Ta hidiye nan umaliyak ta dadagon dakayun ha-on umat hi aton di layon nah aggayam an kanona ya umatak nah mailom an puhan numbotak hi kanona. 8Atok bon dakayuy umat hi aton di bimmobboh-ol an inan di bear an inibtik day impana. Ya hidiyen pangastiguk ke dakayu ya umat hi aton di layon hi aggayam an pumbik-inat kanona.

9Dakayun tatagud Israel madadag kayu te kahingngitanak ke dakayu. Mu kon waday udum an mangihwang ke dakayu hin bokon ha-oy ya abu? 10Numbaga kayuh patul yu, mu daan boh nay pun-iat dan mangihwang ke dakayu? 11Om, indatan dakayuh patul yu gapuh boh-ol ku, mu gapu boh namahig an boh-ol ku ya mina-id ku dida. 12Adiyu kuma nomnomon an kal-ina ot ya adi kayu makastigu te adinadaman makal-iwan di liwat yun iIsrael. Man-uke ya mialig an nitudok ot midulin nan nitudkana. 13Mialig kayu bo nah golang an nate yaden ugge nitungo te numballabag. Man-uket mialig kayuh umat hidin golang ya makudang di nomnom yun adi kayu mumbalbaliw ta muntutuyu kayuh liwat yu.

14Kon ihwang dakayun ha-on hi kate? Adi. Adiyu mo kanan di ‘Maid di maat di kate ke ditaku.’ Ya adiyu mo kanan di ‘Adi taku mabuluk hi lubukan’ te maid moy homok kun dakayu. 15Takon di dakayuy kakadkadangyanan hi kabobboblen mialig kayu nah maluwab an katlubung nah pingngit di wa-el ya ha-oy an AP-APU ya ipaalik di maatung an dibdib an malpu nah mamagan adi maboblayan ta mamag-anan di ob-ob yu ya bubun yu. Ya am-in di nabalol an ngunut yu ya mama-id ke dakayu. 16Hanada ke damdaman ibba yun iSamaria ya makastigu dat mate dah gubat te nginoheyak ke dida. Pumbakdungan di buhul day goggolang an imbabale dat mate da ya pumbughi day putun di binabain numbutyug.”