1Hituwey imbendisyon Moses an tagun Apu Dios nadah holag Israel ot ahi mate:

2Nalpuh APU DIOS nah Bilid an Sinai ya kay algon timmimil nah Bilid an Seir. Himmiyon nalpu nah Bilid an Paran ya waday mundadalang an apuy hi kannawana an inibbaan di himpulun libun anghel. 3Kanan Moses ke APU DIOS di “Pakappinhod muy tatagum ya ipaptok mu dida. Ya nadan tatagum ya munyuung dan he-a ya un-unudon day kalyom an aton da, takon nadan Tugun mun 4nabalol an odon ke didan holag Israel. 5Hi APU DIOS di numbalin an patul nadan holag Israel handih naamungan nadan aap-apu ya nadan tataguna.”

6Hituwey kanan Moses mipanggep nadah holag Reuben: “Hana ot ta tumagu kayun holag Reuben takon di o-oha kayu.”

7Hituwey kanana nadah holag Judah: “Donglom anhan APU DIOS di pumpahpahmokan dah pumpabaddangan dan he-a. Iaddum mu bo dida nadah ibba dan holag Israel ya baddangam didan makihanggah buhul da.”

8Hituwey kanana damdamah mipanggep hi holag Libay: “APU DIOS ipainilam ke didan muttatyum di pinhod mu mipuun nah Urim ya Tummim. Handih pinatnaam didad Massah ya tinibom hidid Meribah an kawad-an di danum an maphod di pangat da. 9Inun-unud day Tugun mu ya uggeda imbahhoy nakitobbalan dan he-a. Ya impatibo dan nahamhamad di naminhod dan he-a mu nadah ammod da, hay imbabale da, ya hay tutulang da. 10Ituttudu da nadah tatagum di tugun mu. Ya mun-appit da nadah altar mu. 11APU DIOS, bendisyonam dida ya umamlong ka nadah ingunu dah punhilbiyan dan he-a. Dadagom ta mama-id nadan makibuhul ke dida ta mama-id da.”

12Hituwey kanan Moses mipanggep nadah holag Benjamin: “Hituwen holag Benjamin di pakappinhod ya pakaaddugan APU DIOS ta nangamung ta maid di ad-adin maat ke dida.”

13Hituwe damdamay kanan Moses mipanggep hi holag Joseph: “Hana ot ta bendisyonan APU DIOS di luta dat maudanan ya mawaday mun-otbol ta adi makudangan hi danum. 14Hana ot ta maptangan nadan bungbunga-an an itanom da ya dumakol di ibunga dah kabulabulan. 15Hana ot ta am-in bo nadan bilid da ya duntug da ya matanoman hi mungkaphod an bungbunga-an. 16Hana ot ta mawadan am-in hi boble day mungkaphod. Ya hana ot ta bendisyonan nan AP-APU an kimmali nah mundadalang an ittay an kaiw dida. Hana ot ta umalin am-in hi holag Joseph datuwen bendisyon te hiyay kay ulun nadan iibana. 17Hi Joseph ya umat hi bulug an bakan nal-ot. Mialig bon hay inlot na ya umat hi hakgud di mailom an baka. Ya mialig an hakgudon nadan himpulun libun holag Eplaim ya kalibulibun holag Manasseh di tataguh kabobboblet itulud da didah pingngit di luta.”

18-19Hituwey kanan Moses mipanggep hi holag Sebulun ya holag Issakar: “Hana ot ta kumadangyan di holag Sebulun hi negosyo nah baybay ya hana ot ta madmad-uman di kinadangyan di holag Issakar nah bobleda. Ikadangyan da nadan wadah baybay ya nadan nitaluh dallom di lona. Ayagan dah di nah bilid day tataguh udum an boblet iappit da nadan lebbengnan miappit ke Apu Dios.”

20Hituwey kanan Moses mipanggep hi holag Gad: “Madayaw hi Apu Dios an nangidat hi ambilog an pumboblayan di holag Gad. Mialig hi layon di holag Gad an munho-ho-od hi dopaponat liputana ya patayona. 21Makakkaphod di pintok dan pumboblayan da. Diday kidatan nadan miong-ong nah mangipangpangulu. Deket naamung nadan aap-apu ya diday mangitakdog nah limpiyun pinhod APU DIOS an maat.”

22Hituwey kanan Moses mipanggep hi holag Dan: “Mialig di holag Dan nah ka-ongal nan layon an immongngal ad Bashan.” 23Hituwey kanan Moses mipanggep hi holag Naptali: “Pakappinhod APU DIOS di holag Naptali ya ongal di bendisyonan dida. Mumboble dah nangappit hi kalin-oban di algo ya nangappit hi south.”

24Ya hituwe damdamay kanana mipanggep hi holag Asher: “Ong-ongal di bendisyon di holag Asher mu hay bendisyon di holag nadan iibana. Hana ot ta diday pakappinhodon nadan iiba da. Ya hana ot ta mahaybong di oliban mitanom hi lutada. 25Hana ot ta maid di manggop hi boble da te gumok ya giniling di hoob na. Ya hana ot ta malinggop dan maid di eda takutan.”

26“Dakayun holag Israel an makalin Jeshurun, maid di ohan e miingngo nah Dios yun madayaw hi kabunyan an kay nunlugan hi kulabut an umalin mamaddang ke dakayu. 27Hiyay kihikugan yu ya hiyay mamaddang ke dakayu ta nangamung. Dinog-al na nadan buhul yu ot kalyonan dakayuy ‘Dadagon yu didan am-in.’ 28Ta deyan malinggop kayu mon holag Israel nah boble yun mahawwahawwal di iliyak yun page ya mainum ya adi makudangan hi udan. 29Dakayun holag Israel, umamlong kayu! Maid di udum an tatagun umat ke dakayun inihwang APU DIOS. Hiyay mialig an happiyo yu ya ispada yu. Baddangan dakayun hiya ta mangapput kayu. Ahi umaliy buhul yun mumpahpahmok ke dakayu, mu ahiyu dadagon nadan pundayawan dah dios da.”