1Datuwe nadan intugun APU DIOS an kalyon Moses nadah holag Israel nah bilid ad Moab ta mid-um hanadah kinalinan aton dah nakitobbalanan dida handi nah Bilid an Sinai.

2-3Inayagan Moses am-in nadan holag Israel ot kananan diday “Impakattibo yun am-in nadan inat APU DIOS nah patul di Egypt, nadah opisyal na ya am-in nah boble da, nadan ligat an pamatnana, nadan milagro ya nadan umipamodwong an inat na. 4Mu ingganad uwani ya ugge in-abulut APU DIOS an maawatan yu nadan na-na-at ke dakayu.* 5Impangulu dakayun ha-on hi nap-at an toon nah adi maboblayan ot miha-ad kayuh di yaden ugge nadunut di bulwati yu ya apatut yu. 6Maid di tinapay an kanon yu ya maid nadan bumutong an inumon yu, mu indatan dakayun APU DIOS hi mahapul yu ta ipainilanan dakayun hiyay Dios yu. 7Ya handih immali takuh tu ya nakigubat hi Sihon an patul di Hesbon ya hi Og an patul di Bashan ke ditaku, mu inapput taku dida. 8Inala taku tun boble da ot idat takun tawid nadan holag Reuben ya holag Gad ya godwan di holag Manasseh. 9Ta hidiye nan paka-un-unudon yun am-in nadan maunud ketuwen nakitobbalan yu ta maphod di pumbalinan am-in di aton yu.

10Dehtu kayun am-in, dakayun aap-apu, opisyal, huwes, ya dakayun linalakin holag Israel an muntattaddog hituh kawad-an APU DIOS an Dios yu. 11Takon di inayan yu, iimbabale yu ya nadan nakiboblen dakayun mangaiw hi itungu yu ya humagob hi danum yu ya dehtu da. 12Dehtu kayud uwanit makitobbalan kayun APU DIOS an Dios yu. Ya hituwen pakitobbalan APU DIOS ke dakayu ya insapatanan maat. 13Pinhod nan mihamad ad uwanin algoy pangibilanganan dakayun tataguna ya hiyay Dios yun hidiyey kinalinan dakayu ya hidiye boy insapatana handidah aammod takun hi Abraham, hi Isaac ya hi Jacob. 14-15Mu bokon dakayu ya abun dehtud uwanih hinangngab nay nakitobbalana, mu takon nadan holag Israel hi udum hi algo.

16Inilak ot manomnom yuy ine-en di nitaguwan taku handih kawada takud Egypt ya handih nalpuwan takuh di ot mundalan takuh boblen nadan buhul taku. 17Ya inilak ot manomnom yu nadan tinibo yun makangngad-adin dios dan nakapyah kaiw, batu, silber ya balituk. 18Man-uket nakitobbalan hi APU DIOS ke dakayu ya ta maid di ohan lalaki weno babai weno hay ohan holag weno ohan puun di e mangiwalong ke APU DIOS an Dios taku ta e mundayaw hi dios nadan tatagun numbobleh di ya ta maid ke dakayuy e mangibunat hi gaga-ihon tagun mialig nah kumdot an kaiw. 19Tibon yu ta maid ke dakayun nangngol ke datuwen idut di e munnomnom an adi maat ke hiya datuwen idut ta ena kanan di ‘Adi maat ke ha-on dadiye takon di at-attok pey pinhod kun aton.’ Man-uke ya hidiyey humlun hi kadadagan yu. 20Adinadaman pakawanon APU DIOS di athidin aton di tagu. Te nan namahig an boh-ol na nah athidin tagu ya mialig nah mundadalang an apuy. Ta maat ke hiyan am-in nadan idut an nitudok tuh liblu ta kaanon APU DIOS di ngadana tuh tap-on di luta. 21Appilon APU DIOS di athidin tagu nadah holag Israel ta ipaenan hiya nadan idut nan nitudok tuh liblun nitudokan di Tuguna.

22Ne hi udum hi algo ya ahi tibon di holag yu ya nadan makiboblen diday ligat ya nadan dogon impaalin APU DIOS tuh boble. 23Ahi mumbalin hi sulfur ya ahin hituwen boble ta maid di tummol hi nganne takon di ohan holok ta mumbalin an umat hi Sodom, Gomorrah, Admah ya Seboim an dinadag APU DIOS gapuh boh-ol na. 24Ta nadan tataguh nunlinikkod ya ahida kanan di ‘Tipe nin ta e in-athitun APU DIOS hituwen boble na? Tipe nin ta e namahig di boh-ol na?’ 25Ya ahi kalyon di tataguy ‘Man-uke ya imbahhon nadan bimmobley nakitobbalan dan APU DIOS an Dios handidan aammod da handih nangilpuwanan didad Egypt. 26Ot hay dios di udum an bobley dinayaw da yaden kinalin APU DIOS dan adida aton di athidi. 27Hidiyey gapunan bimmobboh-ol hi APU DIOS da ot ipaalinan am-in tuh boble da nadan idut an nitudok nah liblu. 28Ya kinaan APU DIOS am-in nadan tataguna ketuwen boble da gapuh namahig an boh-ol na ot ipaena didah udum an boble ot dehdi da ingganad uwani.’

29Hanadan ugge nipainilah tagu ya nangamung hi APU DIOS an Dios taku ke dadiye, mu nadan nipainila ya wadat ingganan ditaku ya nadan holag taku ta kal-ina ot ya un-unudon takun am-in nadan maunud nah Tugun.