1Hituwey ingkantan David handih inihwang APU DIOS hiya ke Saul ya nadan udum an buhul na.

2-3Ipaptokak ya ihwangak ke he-an Dios kun mialig an batun kihikugak ya mialig an happiyok. Hiyay mangipaptok ke ha-on nadah gaga-ihon maat. 4Numpahpahmokak ke hiya ya inihwangak nadah buhul ku, kinali hiyay dayawok.

5-6Gaga-ihoy na-na-at ke ha-on ot namindakol an innang an mateyak ya paddungnay munho-ho-od nan lubuk ke ha-on. 7Ot gapu ke dadiyen namahig an nunholholtapak ya numpabaddangak ke APU DIOS an Dios ku ya dingngol nay dasal ku nah Templonah langit ot baddanganak.

8Gapuh boh-ol na nadah buhul ku ya nungkolyog ta takon nan tinaddogan di kabunyan ya niwagot. 9Paddungnay mun-aahuk di olong na ya mamuddal hi tokonay dalang di apuy an gumeeng. 10Imbughul nay kabunyan ot duma-ul an inggattinah mangitit an kulabut. 11Ya nuntakkeh anghel ot mangen pun-itayap di dibdib. 12Inhaninan hiyay tapol ya mangitit an kulabut an nangdon hi udan. 13Linumsut di hiyona nan mahdol an kulabut ot pun-ipae nay kil-at.

14Hiya an AP-APU an Katagtag-ayan an Dios ya kidul di kalina. 15Impaenay pananat mungkiwahit day buhul na ya impaalinay kil-at ta mamtik da. 16Ya gapuh namahig an boh-ol na nadah buhul na ya nabudhan di dalinat di baybay takon nan nipab-unan tun luta.

17Takon di dehdih tap-onad kabunyan ya nunyuung ot guyudonak nah adallom an danum. 18Inihwangak ke hiya nadah mungkakodhol ya nungkal-ot an buhul kun adik kabaelan an hanggaon. 19Ya inihwangak ke hiya handih immali day buhul kun mangubat ke ha-on nah tiempon waday ligat ku. 20Man-uket binaddanganak ya inihwangak ke hiya nah katatakut an maat ke ha-on te umamlong hi at-attok.

21Inat nah diyen hidiyey ginun-ud ku te maphod di at-attok ya maid di bahul ku. 22Inun-unud ku nadan tuguna ot uggek inat di gaga-ihon te ek inwalong hiya an Dios ku. 23Ya uggek kinal-iwan nadan tuguna, mu inun-unud kun uggek nginohe. 24Inilanan maid di bahul ku te uggek inat di gaga-iho. 25Kinali indat APU DIOS di ginun-ud ku te maphod di at-attok ya inilanan maid di bahul ku.

26APU DIOS, makulug an adim iwalong nadan adi mangiwalong ke he-a ya maphod di pangat mu nadah maid di bahul na. 27Maandong di pangat mu nadah maphod di at-atton da, mu kastiguwom nadan mangat hi gaga-iho. 28Baddangam nadan mumpakumbaba, mu ipababam nadan mumpahhiya.

29APU DIOS an Dios ku, mialig kan dilag kun mamat-al hi tapol an biyag ku. 30Gapuh baddang mu ya kabaelak an apputon nadan makigubat ke ha-on ya gapuh olot kun indat mu ya hogpok di boble takon di nakaalladan.

31Makaphod hi Apu Dios, maid di nihallah pangi-ena. Ya makulug am-in di kalyona. Hiya ya mialig an happiyon manani nadah mihikug ke hiya. 32Hiya ya abuy AP-APU. Hiya ya abuy mialig nah batun kihwangan taku. 33Hiya ya abuy mangipal-ot ke ha-on ya hiyay bumaddang hi pangatak hi maphod. 34Baddanganak ke hiyat nal-otak an bumtik ta ibtikak nadan buhul ku umat hi makawan ibtikanay mun-anup ta ume nadah natag-en bilid ta mihwang. 35Tinudduwanak ta nalaingak an makigubat ya nal-otak an mangiusal hi makodhol an pana.

36APU DIOS, impaptokak ke he-a ot ihwangak an paddungnay hinaniyanak nah happiyom. Binaddanganak te ongal di kabaelam ya maka-ulle kan ha-on ot deyan natag-ey saad ku. 37Gapuh baddang mu ya pamaptok mun ha-on ya maid di oha nadah buhul kuy nangapput ya nampap ke ha-on. 38Mu numpudug ku ot ahan dida ot apputok dida. Ya uggek intikod an nakigubat ke dida inggana dinadag ku didan am-in. 39Nungkatu-i dah hinangngab ku ya adida mo pakataddog.

40Man-uke ya indatanak ke he-ah olot kun makigubat ot apputok dadiyen buhul ku. 41Impatakut mu nadan buhul ku ot bumtik da. Ya gapuh boh baddang mu ya dinadag kun am-in dan humihhingit ke ha-on. 42Indani ya manamak dah bumaddang ke dida, mu maid. Numpahpahmok da bon APU DIOS, mu uggena inihwang dida. 43Numpatek nadan buhul ku ot mungkiwahit dah kakalata, umat nah dap-ul di luta.

44Inihwangak ot uggeyak pinate nadah mangohen tatagu ya tinudduwak an mun-ap-apu takon nadah tataguh udum an boble. 45Ya deket kumaliyak ya un-unudon dan am-in di kalyok. Takon nadan bokon ku tatagu ya munyuung dah punlispitu dan ha-on. 46Nama-id di tulid nadan buhul ku ot munggagayonggong dan mungkaukat nadah nuntaluwan da.

47Madayaw hi APU DIOS an wadat nangamung. Hiya ya mialig nah batun kihikugak. Om, madayaw hi APU DIOS an mangihwang ke ha-on. 48Hiya an Dios di mangibaloh gaga-ihon aton nadan buhul kun ha-on. Binaddanganak ot apputok nadan buhul kuh kabobboblet ha-oy di pun-ap-apu da. 49Ya inihwangak hi buhul ku. APU DIOS, uggem in-abulut an waday gaga-ihon aton di buhul kun ha-on. 50Kinali, ikantak di pundayaw kun he-a, APU DIOS, hi kabobboble tuh luta.* 51Impanganapputak an patul an pinilim ya munnananong di ulem ke ha-on an hi David ya nadah holag ku.