1Ohan algo ya naamung nadan tindalun di Pilistia ad Sokoh an bobled Judah ta eda makigubat. Ot mungkampu dad Ephes Dammim an numbattanan di Sokoh ya Asekah. 2Hi Saul ya nadan tindaluna ya naamung da damdama ot mungkampu da nah bilid nah kad-an di nundotal ad Elah. Ta mundadaanan dan makigubat nadah iPilistia. 3Nundinommang dan nadan iPilistiah ohan bilid ya nadan holag Israel nah oha bon bilid an numbattanan da nan nundotal.

4-5Indani ya bimmudal nah kampun di iPilistia on tagun ongngaongngal an hingihingitona dida. Hiya hi Golayat an kalkal-otan hanadah tindalun di Pilistia an numbobled Gat. Umeh tulun metroy katag-e na. Hay helmet na ya nadan udum an inhuklub nah adol nan gumok ya nalimat pitun kiloy dam-ot na. 6Nahukluban di hukinah gumok ya waday antikken pahul nan giniling. 7Ya wada boy ohan pahul nan ongal ya mahdol an pitun kiloy dam-ot na ya ongal di palat na. Deket mange on mamangpangulu nan nangdon hi happiyona mu hiya.

8Deke on naukat hi Golayat ta tukodana nadan holag Israel an kananay “Dakayun holag Israel an muttatyun Saul! Kon talagan nundadaan kayun makihanggan ha-on? Aga, pumili kayuh ohan makihanggan ha-on. Ha-oy nan natulid an tindalun di Pilistia! 9Deket mangapput nan piliyon yu ta patayonak ya mumbalin kamin himbut yu. Mu deket ha-on di mangapput ya mumbalin kayun himbut mi. 10Aga, daan di ohan dakayun makihanggan ha-on?” 11Handih dingngol da Saul ya nadan tataguna ya namahig di takut da.

12Hi David ya imbabalen nan holag Eprat an hi Jesse ad Betlehem ad Judah. Hi Jesse ya waluy linalakin imbabalena ya naam-ama kediyen numpatulan Saul. 13-15Hanadan tulun nunhahaynod mipalpuh panguluwan an hi Eliab, hi Abinadab ya hi Sammah ya imme dan e nid-um hi tindalun Saul an e makigubat nadah iPilistia. Hi David an udidiyan ya hiyay oha nadah munhilbin Saul, mu deke on immanamut an bumaddang ke amanan mumpattol hi kalnero da.

16Hi Golayat an tindalun di Pilistia ya hingihingitona nadan holag Israel hi kabigabigat nah biggatna ya nah mahmahdom hi nap-at an algo.

17Ohan algo ya kanan Jesse ke David an imbabalenay “Gal-am an ie tun hinsakun nihanglag an boga ya hantun himpulun tinapay nadah iibam. 18Ya hantu ken himpulun mahong-on makan an cheese ya idat mu nah ap-apu da ya papohdanam hin nganney innun nadan iibam. Ya kalyom ta ipaali day tudok da. 19Dehdi nadan iibam ya nadan ibbadan tindalu, takon nan patul an hi Saul nah nundotal ad Elah an makigubat da nadah iPilistia.”

20Nabigat kediye ot itayan David nadan kalnero da hi ohan mumpattol ot mangen inal-ala na nadan makan an ienan inun-unud nay kinalin amana. Kediyen dimmatong nah e-elen nan nungkampuwan nadan ibbadan holag Israel ya dingngol nan muntukuk dan eda makigubat. 21Indani ya nunhinnunnupan mo anhan nadan iPilistia ya holag Israel. 22Inha-ad David nan kargana nah kad-an nan ap-apun di tindalu ot ena hamakon nadan iibana. Ot ne hanhanana hin nganney innun da. 23Kediyen makihumhummangan ke dida ya bimmudal boh Golayat an pun-itkuk nay punhingit na nadah tindalun holag Israel. Ya dingngol David hidiye.

24Indani ya mamtik nadan holag Israel gapuh takut dah nanib-an dan Golayat. 25Munhimbabaggaan dan kanan day “An tinibo yu nan ongal an tagu? Pinadngolan ditakun holag Israel. Ya kon dingngol yuy kinalin nan patul taku an hana ke kanun mamaten Golayat ya ipaahawana nan imbabalenan hiya ya adi pay kanu mumbayad di pamilyanah buwis?”

26Hinanhanan David nadah tindalun kananay “Nganne kanuy midat nah mamate kediyen ongal an tagun iPilistia ta maid moy mumpadngol ke ditakun holag Israel? Dahdi ni-boh naen iPilistia an adi mangulug ke Apu Dios an ena udot padngolan di tindalun nan Dios an wadat nangamung?” 27Ot kalyon dan hiyay gun-udon nan tagun mamaten Golayat.

28Dingngol Eliab an panguluwan an tulang David hidiyen kinalina ya binoh-olana. Kananan hiyay “Man he-a ke ya gaga-iho ka ya kay ka hiyyahiyya! Tipe tuwalit dehtu kan nganney at-attom hitu? Dahdiy mangipaptok nadah kalneron ipattol mu? Man tuwali ot immali ka nin mun-ang-ang hi ine-en tun gubat!”

29Hinumang David an kananay “Maid di udum hi kalkalyok, ammunay munhanhanak!” 30Imme boh David nadah udum an tindalu ot munhanhan ya nun-iingngoy inhumang dan hiya. 31Indani ya naawatan day pinhod David ot eda ipainilan Saul an patul ot ipaayag nah David.

32Kanan David di “Hinae ke ya adi kayu madanagan, ha-oy di nangamung ketuwen iPilistia!” 33Kanan Saul di “Bokon man langlangkak hituwe! An nganne udot di atom an makihanggan hiyan unga ka? Hiya ke ya impalpu na tuwali dih kaunga nan nakigubagubat.”

34Mu hi David ya adi manghop. Kananay “Hana keh pumpattolak hi halun ama ya deket waday inibtik di layon weno bear hi impan di kalnero on 35numpudug kun mun-odonak hi bakdung. Ne pinlok nan inhakmal nan kalnero. Deket eyak kalaton on inid-on kuh hungahung na on binakdungak ta mate. 36Kinali hin kinabaelak an in-athidih layon ya bear ya kon adik damdama iathidi kediyen iPilistia an makangohhen Apu Dios an wadat nangamung? 37Madinolak an hi APU DIOS an nangihwang ke ha-on hanadah layon ya bear ya ihwangak bo kediyen iPilistia.” Loktat ya in-abulut Saul an kananay “Takombo moy ume ka. Nangamung hi APU DIOS an mamaddang ke he-a.”

38-39Indat Saul ke hiya nadan usal nah gubat umat hi helmet, happiyo ya nan gumok an mihuklub hi adol. Ot ipatnan David an in-usal dadiye ta gibokona hin nganney innuna te maid di ena nun-usalan hi umat hidi. Indanit in-akkad nah naminduwa ya midam-otan. Ot pungkaana te kananay maligatan an kumihal. 40Inalana ot ya abu nan bayyabe na ya nan patanong na ot ume. Nundag-u nah wa-el ot pumidit hi liman i-itay an muling an batu ot ihudu nah libbutana na ot mangen ena dammuwon hi Golayat.

41-42Hi ke Golayat ya mangali damdaman namangulun nangdon hi happiyona. Ya patpatibonan aamihona nan ungan hi David an pakihanggana. 43Puntukukanah David an kananay “Kon tipeh naen patanong? Kon ahuwak ta em ilaban ke ha-on hinae?” Ya pun-itobotbal na nah dios nat atonay adi maphod ke David.

44Kanana bon David di “Maka ta ipakan daka nadah hamuti ya nadah mailom an aggayam!” 45Hi David ya initkuk na damdaman hiyan kananay “Ilaban mun ha-on di ispadam ya pahul mu, mu hay bumaddang ke ha-on hi pakihanggaak ke he-a ya nan DIOS an Kabaelanan am-in an Ap-apun di tindalu min holag Israel an hidiye nan Dios an pakangohayyom. 46Ad uwani ya ipaapput dakan APU DIOS ta patayon dakan ha-on ya putulok di ulum. Ya ipakan kuy adol nadan tindalum hi hamuti ya nadah mailom an aggayam ta panginilaan di tataguh kabobboblen waday Dios an mangipaptok nadah holag Israel. 47Ya ta panginilaan damdaman nadan ibbak an holag Israel an adi mahapul APU DIOS di almas an mangihwang ke dakami. Hiyay nangamung hin dahdiy mangapput hi gubat. Kinali paapput dakayun hiya ta dakamiy pangapputona.”

48-49Indani ya mangalih Golayat ya mange damdamah David an e manamun hiya. Kediyen mangeh David ya hinumwong hi batu ot bayyabeyonah Golayat ya niptok hi tuktuk na. Immed dalom nan batu ot munhakkub hi Golayat. 50-51Bintik David ot ena uknuton di ispadan Golayat ot pamutul nah uluna. Athidiy nangapputan David ke Golayat an uggena in-usal di ispadana, mu abuna nan bayyabe na.

Handih tinibon nadan iPilistia an nate nan tobalon dan nakatullid an tindalu da ya namtik da gapuh takut da. 52Ya muntukuk nadan holag Israel yaden pumpudug da dida nah kalatan mumpaed Saaraim ingganad Gat ya Ekron. Numpate da dida ot kawahwahit nadah kakalatay adol nadan iPilistian nungkakate. 53Nibangngad dadiyen holag Israel ot eda pun-alan am-in di wadah kampun nadan iPilistia. 54Inalan David nan ulun Golayat an iPilistia ot ie nad Betlehem an boble dan nih-up ad Jerusalem. Impakialana nan almas Golayat ot ena idulin hi bale da. Nabaybayag ot ahida iey ulun Golayat ad Jerusalem.

55Handih tibtibbon Saul hi David an makilaban ke Golayat ya kananan Abner an ap-apu nadan tindalunay “Dahdiy aman din unga?” Ya kanan Abner di “Uggek damdama inila apu patul.” 56Ot kanan Saul ke Abner di “Em hanhanan.”

57Indani ya immalih David nah kampu dan nanongnan oodnanay ulun Golayat. Ot ipangulun Abner hi kad-an Saul. 58Ya kanan Saul ke hiyay “Kalyom ke ha-on hin dahdih amam.” Ya kanan David di “Hi Jesse ad Betlehem.”