1Numpakapyah David hi babalen pumbalayana nah boblen ningadan di ngadana ya kinapya nay pangiha-adana nah Kahon Apu Dios ot atopanah tulda. 2Ot kananay “Deket it-an taku nan Kahon Apu Dios ya ammuna nadan holag Libay an mangdon te dida ya abuy tinuddun APU DIOS an munhilbin hiya ta nangamung.”

3Impaayag David am-in nadan ibbanan holag Israel ta maamung dad Jerusalem ta ie da nan Kahon Apu Dios nah kinapya nan pangiha-adan da. 4Ya impaayag na bo nadan holag Libay takon nadan papadin holag Aaron. Datuwe nadan immali: 5Hanadah holag Kohat ya immalih Uriel ya nadan ibbanan hinggatut ta duwampulu. 6Hanadah holag Merari ya hi Asaiah an ibbanay duwan gatut ta duwampulu. 7Hanadah holag Gershon ya hi Joel an ibbanay hinggatut ta tulumpulu. 8Hanadah holag Elisaphan ya hi Semaiah an ibbanay duwanggatut. 9Hanadah holag Hebron ya hi Eliel an ibbanay nawalu. 10Ya nadah holag Ussiel ya hi Amminadab an ibbanay hinggatut ta himpulut duwa.

11Inayagan David nadan padi an hi Sadok ya hi Abiathar ya nadan onom an holag Libay an hi Uriel, hi Asaiah, hi Joel, hi Semaiah, hi Eliel ya hi Amminadab 12ot kananan diday “Dakayuy mangipangpangulu nadah ibba yun holag Libay. Aton yun am-in nan ine-en di punlinih adol yu ta ie yu nan Kahon nan AP-APU an Dios di holag Israel nah indadaan kun kiha-adana. 13Man-uket kinastigu ditaku handi ke APU DIOS an Dios taku ya uggeyu impah-on hidiyen Kahon handih etaku ot kuma ibangngad ad Jerusalem. Ketuwen inat taku ya ugge taku dinayaw hi APU DIOS.”

14Inat nadan padi ya nadan holag Libay nan ine-en di punlini dah adol da ot ahida ie nan Kahon nan AP-APU an Dios di holag Israel nah kiha-adana. 15In-attang nadan holag Libay nan Kahon APU DIOS te hidiye tuwaliy kinalina handi ke Moses an aton da.

16In-olden David nadah mangipangpanguluh holag Libay an piliyon da nadah ibba day mungkanta ya mangipagangoh cymbal, ayyuding ya gitala ya mungkantah mumpaan-anla nah pundayawan da. 17Ot datuwe nadan pinili da: hi Heman an imbabalen Joel ya nan ibanan hi Asap an imbabalen Berekiah. Ya napili bo nan ohan iba dan hi Ethan an imbabalen Kusaiah an nahlag ke Merari. 18Hanadan udum an napilin mamaddang ke dida ya hi Sekariah, hi Jaasiel, hi Semiramot, hi Jehiel, hi Unni, hi Eliab, hi Benaiah, hi Maaseiah, hi Mattitiah, hi Eliphelehu, hi Mikneiah ya nadan mangidakig hi hoob an da Obed Edom ke Jeiel. 19Hi Heman, hi Asap ya hi Ethan di napilin mangipagangoh giniling an cymbal. 20Hi Sekariah, hi Asiel, hi Semiramot, hi Jehiel, hi Unni, hi Eliab, hi Maaseiah ya hi Benaiah di mangdon hi ayyuding. 21Ya nadan napilin munggitala ya hi Mattitiah, hi Eliphelehu, hi Mikneiah, hi Obed Edom, hi Jeiel ya hi Asasiah. 22Hay ap-apu dan am-in an holag Libay an kon ngunuh mungkanta ya mumpagango nah pundayawan ya hi Kenaniah.

23-24Hay guwalyan nan Kahon Apu Dios ya hi Berekiah, hi Elkanah, hi Obed Edom ya hi Jehiah. Hanadan padin mumpagangoh tangguyub nah hinangngab nan Kahon Apu Dios ya hi Sebaniah, hi Joshaphat, hi Nethanel, hi Amasai, hi Sekariah, hi Benaiah ya hi Elieser.

25Imme da David ya nadan mangipangpanguluh holag Israel ya nadan aap-apun di hinlibun tindalunah balen Obed Edom an e mangala nah Kahon APU DIOS an niha-adan di Nakitobbalana. Ya anakkayang an nun-an-anla da. 26In-appit dan Apu Dios di pitun bulug an baka, pitun kalnero te badbaddangan Apu Dios nadan holag Libay an nangiattang nah Kahona. 27Makaphod di imbulwatin David. Ya makaphod damdamay imbulwatin nadan mungkanta ya mumpagangoh ayyuding ya gitala ya hi Kenaniah an ap-apu da ya nadan nangiattang nah Kahon Apu Dios. 28Am-in nadan holag Israel ya naki-e dan e nangala nah Kahon APU DIOS an niha-adan di Nakitobbalana. Indatong dad Jerusalem ya muntutukuk dah anla da ya pun-ipagango day tangguyub, cymbals, ayyuding ya gitala.

29Kediyen pun-idatong da nan Kahon APU DIOS nah boble ya indung-on Mikal an imbabalen Saul hi tawang ya tinibonah David an patul an manmannayo ya mumpaypaytuk gapuh anlana ya pinihul nah hiyah nomnom na.