1Datuwey holag Judah: hi Peres, hi Hesron, hi Karmi, hi Hur ya hi Sobal. 2Hi Sobal ya nahlag ot hi Reaiah an hi aman Jahat. Nahlag hi Janat ot hi Ahumai ke Lahad an diday nahlagan nadan iSorah. 3-4Nahlag da Kaleb ke Eprathah ot hi Hur an panguluwan. Nahlag hi Hur ot diday numbobled Betlehem. Tulu day imbabalen Hur an hi Etam, hi Penuel ya hi Eser. Nahlag hi Etham ot nadan tulun linalakin hi Jesreel, hi Isma ya hi Idbas ya nan ohan babain hi Hasselelponi. Hanadan holag Penuel di numbobled Gedor ya nadan holag Eser di numbobled Hushah. 5Hi Ashur an nangapya nah boble an Tekoa ya duway inayanan da Helah ke Naarah. 6Opat di linalakin imbabalen da Ashur ke Naarah an hi Ahussam, hi Hepher, hi Temeni ya hi Haahastari. 7Ya nadan imbabalen da Ashur ke Helah an hi Seret, hi Ishar, hi Etnan ya 8hi Kos di aman da Anub ke Sobebah ya hiyay ammod nadan holag Aharhel an imbabalen Harum.

9Wada bo on hi Jabes an pakallispituwon di pamilyana ya iibana. Nunlohanana inana handih e mitungo, kinali Jabes di impungngadanan hiya. 10Mu nundasal hi Jabes nah Dios nadan holag Israel ot kananah dasal nay “Bendisyonanak Apu Dios ta idatanak hi ambilog an luta. Ya baddanganak ta adik aton di gaga-ihon humlun hi punholholtapak.” Dingngol Apu Dios hidiyen dasal na ot idat na nan imbaganah dasal na.

11Hi Kelub an tulang Suhah ya nahlag ot nan ohan lalakin imbabalenan hi Mehir. Nahlag hi Mehir ot hi Eston 12an tuluy linalakin imbabalena: hi Bet Rapha, hi Paseah ya hi Tehinnah an nangapya nah boble an Nahas. Hanadan holag da ya numboble dad Rekah. 13Hi Kenas ya duway linalakin imbabalenan da Otniel ke Seraiah. Duwa damdamay linalakin imbabalen Otniel an da Hathat ke Meonothai. 14Nahlag hi Meonothai ot hi Oprah. Hi Seraiah di aman Joab an nangapya nah boble an kanan dan Boblen di Makangunnu te am-in nadan numbobleh di ya nalaing dah mipanggep hi ngannen ngunu. 15Hi bo Kaleb an imbabalen Jephunneh ya tuluy linalakin imbabalenan hi Iru, hi Elah, ya hi Naam. Nahlag hi Elah ot hi Kenas. 16Hi Jehallelel ya opat di linalakin imbabalenan hi Sip, hi Sipah, hi Tiria ya hi Asarel. 17-18Hi Ezrah ya opat di linalakin imbabalenan hi Jether, hi Mered, hi Epher ya hi Jalon. In-inen Mered hi Bithiah an imbabalen nan patul di Egypt ot waday ohan babain imbabale dan hi Miriam, ya duway linalakin imbabale dan da Sammai ke Isbah. Hi Isbah di nangapya nah boble an Estemoa. In-ine bon Mered di ohan babain holag Judah ot waday tulun linalakin imbabale dan hi Jered di oha an hiyay nangapya nah boble an Gedor. Hi Heber boy mikadwa an hiyay nangapya nah boble an Soko. Ya hi Jekutiel di mikatlu an hiyay nangapya nah boble an Sanoah. 19Hi Hodiah ya in-inena nan tulang Naham. Hay imbabalena ya aman Keilah an Garmite ya hi Estemoa an Maakatite. 20Hi Simon ya opat di imbabalenan linalakin hi Amnon, hi Rinnah, hi Ben Hanan ya hi Tilon. Duway imbabalen Ishi an linalakin da Sohet ke Ben Sohet. 21Datuwey holag Selah an imbabalen Judah: hi Er an aman Lekah, hi Laadah an aman Mareshah. Hanadan udum an holag na ya nalaing dan mun-abol an numboble dad Bet Asbea, 22hi Jokim ya nadan iibanan numbobled Koseba ya da Joash ke Sarap an nangiineh binabain iMoab ot eda mumbobled Jeshubi Lehem. Nipalpu tuwali handih done ya diday 23manganapyah banga te ingunuwan da nan patul. Hay numboblayan da ya ad Nethim ya ad Gederah.

24Hi Simeon ya limay linalakin imbabalenan hi Nemuel, hi Jamin, hi Jarib, hi Serah ya hi Saul. 25Hay imbabalen Saul ya hi Sallum an aman Mibsam an aman Misma. 26Hi Misma ya aman Hammuel an aman Sakkur an aman Simei. 27Himpulut onom di linalakin imbabalen Simei ya onom di binabaih imbabalena. Mu o-ohay imbabalen di tutulang na, kinali o-ohay nahlag ke Simeon. Adi umat ke Judah an dakdakol di holag na. 28Inggana handih numpatulan David ya hay numpumboblayan nadan holag Simeon ya ad Beersheba, Moladah, Hasar Sual, 29Bilhah, Esem, Tolad, 30Bethuel, Hormah, Siklag, 31Bet Markabot, Hasar Susim, Bet Biri ya Saaraim. 32Numboble da pay ad Etam, Ain, Rimmon, Token ya ad Ashan, 33takon hanadah nungkih-up an boble ingganad Baalat. Datuwey listaan di aammod da ya nadan numboblayan da. 34-38Datuwey udum an holag Simeon: hi Meshobab, hi Jamlek, hi Joshah an imbabalen Amasiah, hi Joel, hi Jehu an imbabalen Joshibiah an imbabalen Seraiah an imbabalen Asiel, hi Elioenai, hi Jaakobah, hi Jeshohaiah, hi Asaiah, hi Adiel, hi Jesimiel, hi Benaiah, hi Sisa an imbabalen Siphi an imbabalen Allon an imbabalen Jedaiah an imbabalen Simri an imbabalen Semaiah.

39Indani ya mungkadakol di holag da ot mumpae dah nangappit hi kalin-oban di algod Gedor ot ipattol day aggayam da nah nundotal hidih kad-an nan boble. 40Dinatngan dah diyen boblen maphod an pumpattolan, ambilog ya ugge linikkub di bilid ya madin-ong ya malinggop. Hay numbobleh di ya nadan holag Ham. 41Handih numpatulan Hesekiah ad Judah ya imme datuwen natonton an tatagud Gerar ot gubaton da dadiyen holag Ham ya nadan Meunites an numbobleh di. Pina-i day babale da ya kampu da ot dog-alon da dida ot diday nihannot an numbobleh di te makaphod hidiyen boblen pumpattolan te dakol di kanon di kalnero da. 42Wada boy liman gatut an holag Simeon an numpaed Edom* hi nangappit hi timilan di algo. Hay nangipangulun dida ya nadan imbabalen Ishi an hi Pelatiah, hi Neariah, hi Repaiah ya hi Ussiel. 43Pinate da nadan natdaan an iAmalek hidid Edom ot diday mumbobleh di nipalpun diye.