1Rəbbilqa şukur hee'e!
Nimee baxtivariy Rəbbile qəyq'ənna,
Mang'un əmırbı yik'eençe ha'ana!
2Qəyq'anang'un uşaxar ç'iyeyne aq'val gucuka vuxhes,
Qopkuyng'unbışde uşaxaaşeeb xayir-düə alyapt'as.
3Qopkuynbı karnanbı, barakatnanbı vuxhes,
Manbışda qopkuvalla, mısacab aagvales deş.
4Miç'axiyvaleeyid qopkuynbışdemee nur ixhes,
Manbı yugun, rəhı'mıkan, qopkuyn insanar vob.
5Qidiykkın borcbı helenbışiqayiy horbı hidya'anbışiqa
yugna ı'mı'r vuxhes.
6Məxbın insanar mısacab qaçaaxaras deş,
Qopkuyn insanar hammaşe yik'bışee aaxvas.
7Manbı pisde xabarıle qəvəəq'ənas deş,
Rəbbilqa qibzırva manbışin yik'bı it'umda ixhes.
8Manbışin yik'bı it'umda vod, manbı qəvəəq'ənas deş,
Manbışik'le con duşmanar avub aaxva g'avces.
9Manbışe con var-devlet, kar deşinbışis qidiykkın bit'al hı'ı,
Manbışda qopkuvallab hammaşiys aaxvas,
Manbışde gucus geeb hı'rmat gyuvxhes.
10Karaı'dəəne insanık'le man g'acu qəl vuxhes,
Manbışe mizyar ats'ak'vanas, əəq'əsınbı.
Manbışis ıkkananbı ixhes deş.